തൃണമുൽ കോൺഗ്രസിന് തിരിച്ചടി; പശ്ചിമബംഗാൾ ഗതാഗത മന്ത്രി രാജിവെച്ചു

ന്യൂഡൽഹി: തൃണമുൽ കോൺഗ്രസ് നേതാവും പശ്ചിമബംഗാൾ ഗതാഗത മന്ത്രിയുമായ സുവേന്ദു അധികാരി മന്ത്രിസ്ഥാനം രാജിവെച്ചു. എച്ച്ആർബിസി സ്ഥാനം രാജിവെച്ചതിന് പിന്നാലെയാണ് സുവേന്ദു മന്ത്രിസഭയിൽ നിന്നും രാജിവെച്ചത്. മുഖ്യമന്ത്രി മമതാ ബാനർജിക്കാണ് ഇദ്ദേഹം രാജിക്കത്ത് നൽകിയത്.

പാർട്ടിയുമായി ഇടഞ്ഞ് നിൽക്കുന്ന നേതാവാണ് സുവേന്ദു അധികാരി. മുഖ്യമന്ത്രിയെ അഭിസംബോധന ചെയ്ത് സുവേന്ദു തയ്യാറാക്കിയ രാജി കത്തിന്‍റെ പകർപ്പ് ലഭിച്ചതായി സംസ്ഥാന ഗവർണർ ജഗ്ദീപ് ധൻകർ വ്യക്തമാക്കി. രാജിക്കത്ത് ലഭിച്ചതായി ട്വിറ്ററിലൂടെയാണ് ഗവർണർ പ്രതികരിച്ചത്.

Also Read : കർഷക മാർച്ചിന് ഡൽഹിയിൽ പ്രവേശിക്കാൻ അനുമതി; ബുരാരിയിലെത്തി പ്രതിഷേധിക്കാമെന്ന് പോലീസ്

നന്ദിഗ്രാം എംഎൽഎയായ സുവേന്ദു അധികാരി കഴിഞ്ഞ മൂന്ന് മാസമായി പാർട്ടിയുമായി അകന്ന് നിൽക്കുകയായിരുന്നു. പാർട്ടി യോഗങ്ങളിലും ക്യാബിനറ്റ് യോഗങ്ങളിലും ഇദ്ദേഹം പങ്കെടുക്കാറുണ്ടായിരുന്നില്ലെന്നാണ് റിപ്പോർട്ട്. അതേസമയം സുവേന്ദു എംഎൽഎ സ്ഥാനം രാജിവെച്ചിട്ടില്ല.

തൃണമൂൽ കോൺഗ്രസിന്‍റെ കൊടിയോ, ബാനറുകളോ, നേതാക്കളുടെ ചിത്രങ്ങളോ ഇല്ലാതെ സ്വന്തമായി റാലികളും സുവേന്ദു സംഘടിപ്പിച്ചിരുന്നു. മമത ബാനർജിയുടെ അന്തരവനും ലോക് സഭാ എംപിയുമായ അഭിഷേക് ബാനർജിക്ക് പ്രധാന്യം നൽകിയതിൽ ഇദ്ദേഹം അതൃപ്തനായിരുന്നെന്നാണ് റിപ്പോർട്ടുകൾ.

Also Read : ട്രക്കുകൾ തള്ളി നീക്കി കർഷകർ മുന്നോട്ട്; ഡൽഹി അതിർത്തിയിൽ സംഘർഷം, പരസ്പരം കല്ലേറ്

അടുത്തവർഷം പശ്ചിമബംഗാളിൽ നിയമസഭ തെരഞ്ഞെടുപ്പ് നടക്കാനിരിക്കവേ മുതിർന്ന നേതവിന്‍റെ പിന്മാറ്റം പാർട്ടിയ്ക്ക് തിരിച്ചടിയാകുമെന്നാണ് വിലയിരുത്തപ്പെടുന്നത്.