മുത്തലാഖ് മാറ്റിയെഴുതാനാവില്ല:മുസ്ളിം വ്യക്തിനിയമ ബോര്‍ഡ്

ന്യൂഡൽഹി: വ്യക്തിനിയമത്തിലെ മുത്തലാഖ് ഉൾപ്പടെയുള്ളവ മാറ്റിയെഴുതാനാവില്ലെന്ന് മുസ്ലിം വ്യക്തി നിയമ ബോർഡ് സുപ്രീം കോടതിയെ അറിയിച്ചു.സാമൂഹ്യ പരിഷ്കരണത്തിന്‍റെ പേരിൽ ഇത് മാറ്റിയെഴുതാനാവില്ലെന്നു ബോർഡ് ഉറപ്പിച്ചു പറഞ്ഞു. ഭർത്താവു ഭാര്യയെ കൊല്ലുന്നതിനേക്കാൾ നല്ലതാണ് മുത്തലാഖ് ചൊല്ലുന്നതെന്ന് ബോർഡ് വാദിച്ചു.

മുസ്ലിം പുരുഷന്മാർക്കുള്ള മുത്തലാഖ് അവകാശം റദ്ദു ചെയ്യണമെന്ന് ആവശ്യപ്പെട്ട് ഇസ്രത് ജഹാൻ എന്ന യുവതി സുപ്രീം കോടതിയെ സമീപിച്ചിരുന്നു. അതിൽ കേന്ദ്രസർക്കാറും മുസ്ലിം വ്യക്തി നിയമ ബോർഡും നിലാപാട് വ്യക്തമാക്കണമെന്ന് കോടതി ആവശ്യപ്പെട്ടിരുന്നു. പുരുഷന്മാരുമായി താരതമ്യം ചെയ്യുമ്പോൾ സ്ത്രീകൾ ദുർബ്ബലരാണെന്നും,ഭാര്യ-ഭർതൃ ബന്ധത്തിലെ അഭിപ്രായ വ്യത്യാസങ്ങളുമായി കോടതിയിൽ പോയാൽ നടപടികൾ നീണ്ടു പോകുമെന്നും ബോർഡ് വ്യക്തമാക്കി.

കൂടാതെ ബഹുഭാര്യാത്വം അവിഹിത ബന്ധം ഉണ്ടാകുന്നത് തടയുമെന്നും അവർ കോടതിയിൽ പറഞ്ഞു. എന്നാൽ മുത്തലാഖ് ഇന്ത്യൻ ഭരണഘടനയുടെ ലംഘനമാണെന്ന് ഹർജിക്കാരി വാദിച്ചു. ഏകീകൃത സിവിൽ കോഡ് വേണമെന്ന് വാദിക്കുന്ന ബിജെപി നേതൃത്വത്തിലുള്ള കേന്ദ്ര സർക്കാരിന്‍റെ നിലപാട് ഈ കേസിൽ അതീവ നിർണായകമാണ്.