നൂറ്റാണ്ടു പഴക്കമുള്ള 'പുഷ്പവന്ത് കൊട്ടാരം' ഇനി ടാഗോര്‍ മ്യൂസിയം

അഗര്‍ത്തല: ത്രിപുരയിലെ 101 വര്‍ഷം പഴക്കമുള്ള പുഷ്പവന്ത് കൊട്ടാരം ടാഗോര്‍ മ്യൂസിയവും ഗവേഷണസ്ഥാപനവുമാക്കി മാറ്റി പ്രവര്‍ത്തിപ്പിക്കാന്‍ തീരുമാനം. ഇതുവരെ ഗവര്‍ണറുടെ വസതിയായിരുന്നു കൊട്ടാരം. എന്നാല്‍ ബുധനാഴ്ച മുതല്‍ രാജ്ഭവന്‍ അഗര്‍ത്തലയിലെ ക്യാപിറ്റല്‍ കോംപ്ലക്സില്‍ ഉള്ള മറ്റൊരു കെട്ടിടത്തിലേയ്ക്ക് മാറ്റി സ്ഥാപിച്ചതോടെയാണ് പുതിയ പദ്ധതി.

പഴയ ഇടതുപക്ഷ സര്‍ക്കാര്‍ മുന്നോട്ടു വച്ച നിര്‍ദ്ദേശം നടപ്പിലാക്കുകയാണ് പുതുതായി ഭരണത്തിലെത്തിയ ബിജെപി ചെയ്യുന്നതെന്ന് ഗവര്‍ണറുടെ സെക്രട്ടറി സമര്‍ജിത് ഭൌമിക് പറഞ്ഞു.

പുതിയ കെട്ടിടത്തിന്‍റെ ഉദ്ഘാടനം ത്രിപുര ഗവര്‍ണര്‍ തഥാഗത റോയ് നിര്‍വ്വഹിച്ചു. മുഖ്യമന്ത്രി ബിപ്ലബ് കുമാര്‍ ദേബ് സന്നിഹിതനായിരുന്നു. 34 കോടി രൂപ ചെലവിലാണ് ഈ കെട്ടിടം പണി കഴിപ്പിച്ചിട്ടുള്ളത്‌. ഭൂകമ്പത്തെ ചെറുക്കുന്ന സാങ്കേതിക വിദ്യ കൂടി ഉള്‍പ്പെടുത്തിയാണ് നിര്‍മ്മാണം.