അർണബുമായുള്ള വാട്സാപ്പ് ചാറ്റ് പുറത്തുവന്നതിനു പിന്നാലെ ബാർക്ക് മുൻ സിഇഒ ആശുപത്രിയിൽ

മുംബൈ: റിപ്പബ്ലിക്ക് ടിവി മേധാവി അർണബ് ഗോസ്വാമിയുമായുള്ള വാട്സാപ്പ് ചാറ്റ് പുറത്തുവന്നതിനു പിന്നാലെ ബാർക്ക് മുൻ സിഇഒ പാർത്തോ ദാസ് ഗുപ്ത ആശുപത്രിയിൽ. പ്രതികരണ ശേഷി നഷ്ടപ്പെട്ട അദ്ദേഹത്തെ ഐസിയുവിൽ പ്രവേശിപ്പിച്ചിരിക്കുകയാണ്. രക്തസമ്മർദ്ദം കൂടുകയും രക്തത്തിലെ പഞ്ചസാരയുടെ അളവ് കുറഞ്ഞതിനെത്തുടർന്നുമാണ് ആശുപത്രിയിൽ പ്രവേശിപ്പിച്ചത്. മുംബൈയിലെ ജെജെ ആശുപത്രിയിലാണ് ഇയാളെ പ്രവേശിപ്പിച്ചിരിക്കുന്നത്.

ടിആർപി തട്ടിപ്പുമായി ബന്ധപ്പെട്ട് മുംബൈ തലോജ ജയിലിലായിരുന്നു പാർത്തോദാസ്. ഡിസംബർ 24-നാണ് പർത്താദാസിനെ പോലീസ് അറസ്റ്റ് ചെയ്തത്. ടിആർപി തട്ടിപ്പിന്റെ മുഖ്യ സൂത്രധാരൻ പാർത്താദാസ് ആണെന്നാണ് മുംബൈ പോലീസിന്റെ കണ്ടെത്തൽ. 2019-ൽ അർണബും പാർത്തോദാസും നടത്തിയ വാട്സാപ്പ് ചാറ്റിന്റെ വിവരങ്ങളാണ് ഇന്നലെ സമൂഹമാധ്യമങ്ങൾ വഴി പുറത്തുവന്നത്.

ഒടുവിൽ രഹസ്യം പുറത്ത്: അർണബ് ഗോസ്വാമിയുടെ വാട്സാപ് സന്ദേശങ്ങൾ സമൂഹമാധ്യമങ്ങളിൽ വൈറൽ
ബാർക്ക് റേറ്റിങ് റിപ്പബ്ലിക്ക് ടിവിക്ക് അനുകൂലമാക്കുന്നതിന് വാട്സാപ്പ് വഴിയാണ് ഇരുവരും ചർച്ച നടത്തിയത്. ബിജെപി സർക്കാരിൽ നിന്നും സഹായം വാങ്ങിത്തരാമെന്ന വാഗ്ദാനവും അർണബ് പാർത്തോദാസിന് നൽകിയിട്ടുണ്ട്. പ്രധാനമന്ത്രിയുടെ മാധ്യമ ഉപദേഷ്ടാവ് സ്ഥാനം നൽകണമെന്നാണ് പാർത്തോ ദാസ് ഇതിനു പകരമായി ആവശ്യപ്പെട്ടത്.

പ്രധാനമന്ത്രിയുടെ ഓഫീസ്, കേന്ദ്ര മന്ത്രിമാർ, ബിജെപി നേതാക്കൾ എന്നിവരുമായി നടത്തിയ വാട്സാപ്പ് ചാറ്റും പുറത്തുവന്നിട്ടുണ്ട്. മാധ്യമ പ്രവർത്തകർക്കെതിരെയും അർണബ് മോശം പരാമർശം ഉപയോഗിക്കുന്നതായി ചാറ്റുകളിൽ കാണാം. ചാറ്റിൽ എഎസ് എന്ന് ഉപയോഗിച്ചിരിക്കുന്നത് അമിത് ഷായാണെന്നാണ് സോഷ്യൽ മീഡിയയുടെ കണ്ടെത്തൽ.