ചെന്നൈ: തമിഴ്നാട് മുൻ മുഖ്യമന്ത്രി ജെ ജയലളിതയ്ക്ക് ആദരം അർപ്പിക്കാൻ റാലിയുമായി ടി ടി വി ദിനകരൻ. ജയലളിതയുടെ ഒന്നാം ചരമവാർഷിക ദിനമായ ഇന്ന് ചെന്നൈ മറീന ബീച്ചിലെ ശവകുടീരത്തിലേക്ക് അനുയായികൾക്ക് ഒപ്പം റാലിയുമായാണ് ദിനകരൻ എത്തിയത്.
ജയലളിത മരിച്ചതിനെ തുടർന്ന് അനാഥമായ ആർ കെ നഗറിൽ ഈ മാസം 21നാണ് ഉപ തെരഞ്ഞെടുപ്പ്.
ആർ കെ നഗർ ഉപതെരഞ്ഞെടുപ്പിൽ സ്വതന്ത്ര സ്ഥാനാർത്ഥിയായി ടി ടി വി ദിനകരൻ മൽസരിക്കുന്നുണ്ട്.
തമിഴ്നാട് രാഷ്ട്രീയത്തിൽ പ്രത്യേകിച്ച് എ ഐ എ ഡി എം കെയിൽ വലിയ ചലനങ്ങളാണ് ജയലളിതയുടെ വിയോഗം സൃഷ്ടിച്ചത്. ജയലളിതയുടെ കീഴിൽ ഒറ്റക്കെട്ട് ആയിരുന്ന എ ഐ എ ഡി എം കെ നിലവിൽ ഛിന്നഭിന്നമായിരിക്കുകയാണ്.
അതേസമയം, ജയലളിതയുടെ മരണം സംബന്ധിച്ചുള്ള വിവാദങ്ങൾക്ക് അവസാനമായിട്ടില്ല. അപ്പോളോ ആശുപത്രിയിലെ മാസങ്ങൾ നീണ്ട ആശുപത്രി വാസവും പിന്നീട് 2016 ഡിസംബർ അഞ്ചിന് സ്ഥിരീകരിച്ച മരണവും ഒരുപാട് ദുരൂഹതകൾ ആണ് ബാക്കി വെച്ചത്.