ബെംഗളൂരുവില്‍ വിമാനങ്ങള്‍ കൂട്ടിയിടിയില്‍ നിന്നും രക്ഷപ്പെട്ടത് തലനാരിഴയ്ക്ക്

ബെംഗളൂരു: ബെംഗളൂരുവിലേക്കുളള വ്യോമപാതയില്‍ രണ്ട് ഇന്‍ഡിഗോ വിമാനങ്ങള്‍ കൂട്ടിയിടിയില്‍ നിന്നും തലനാരിഴയ്ക്ക് രക്ഷപെട്ടു. ഉടന്‍ രണ്ടു വിമാനങ്ങളിലേയും പൈലറ്റുമാര്‍ക്ക് അടിയന്തിരമായി ജാഗ്രതാ നിര്‍ദേശം നല്‍കിയതോടെ വിമാനങ്ങള്‍ അകലം പാലിക്കുകയായിരുന്നു.

വന്‍ അപകടമാണ് ഇത് മൂലം ഒഴിഞ്ഞുമാറിയത്. ഇരുവിമാനങ്ങളും തമ്മിലുണ്ടായിരുന്ന അകലം 200 അടി മാത്രമായിരുന്നു. കോയമ്പത്തൂരില്‍ നിന്നു ഹൈദരാബാദിലേക്കു പോവുകയായിരുന്ന ഇന്‍ഡിഗോ വിമാനവും ബെംഗളൂരുവില്‍ നിന്നും കൊച്ചിയിലേക്കു പോവുകയായിരുന്ന വിമാനവുമാണ് കൂട്ടിയിടിയില്‍ നിന്നു രക്ഷപ്പെട്ടത്.

ഇരുവിമാനങ്ങളിലുമായി മുന്നൂറ്റി മുപ്പതു യാത്രക്കാരാണ് ഉണ്ടായിരുന്നത്. സംഭവത്തില്‍ എയര്‍ക്രാഫ്റ്റ് ആക്സിഡന്റ് ഇന്‍വെസ്റ്റിഗേഷന്‍ ബോര്‍ഡ് അന്വേഷണം ആരംഭിച്ചിട്ടുണ്ട്.