നിലവിലെ കണക്കുകൾ തെറ്റ്? ബെംഗളൂരുവിൽ 2.23 ലക്ഷം ആളുകള്‍ക്ക് കൊവിഡ് ബാധിച്ചിട്ടുണ്ടാകാമെന്ന് റിപ്പോർട്ട്

ബംഗളൂരു: കൊവിഡ്-19 കേസുകൾ വർധിക്കുന്ന ബെംഗളൂരുവിൽ രോഗബാധിതരുടെ എണ്ണം നിലവിലുള്ളതിനേക്കാൾ കൂടുതലായിരിക്കുമെന്ന് റിപ്പോർട്ട്. 1.3 കോടി ജനസംഖ്യയുള്ള നഗരത്തിൽ 15,052 പേർക്ക് കൊവിഡ് ബാധയുണ്ടായെന്നാണ് സ്ഥിരീകരിച്ച റിപ്പോർട്ട്. എന്നാൽ 2.23ലക്ഷം ആളുകൾക്ക് രോഗബാധ ഉണ്ടായിട്ടുണ്ടാകാം എന്നാണ് വിദഗ്‌ധർ വ്യക്തമാക്കുന്നത്.

Also Read: പ്ലസ് ടു ഫലം പ്രഖ്യാപിച്ചു; 85.13% വിജയം; ഫലമറിയാൻ ഈ വെബ്സൈറ്റുകൾ

കൊവിഡ് പ്രതിരോധ പ്രവർത്തനങ്ങൾ തുടരുന്ന വിദഗ്‌ധരാണ് ഈ അഭിപ്രായം മുന്നോട്ട് വെച്ചത്. നിലവിലെ കണക്കുകളിൽ വീഴ്‌ച സംഭവിച്ചതാകാമെന്നും കഴിഞ്ഞ തിങ്കളാഴ്‌ച മാത്രം നഗരത്തിൽ 1315 പുതിയ കൊവിഡ് കേസുകളാണ് റിപ്പോർട്ട് ചെയ്‌തിരിക്കുന്നതെന്നും ഇവർ പറയുന്നു. സമാനമായ കണക്കുകളാകാം കഴിഞ്ഞ മാസങ്ങളിലും റിപ്പോർട്ട് ചെയ്‌തത്. അങ്ങനെ എങ്കിൽ നിലവിലെ കണക്കുകളേക്കാൾ കൂടുതൽ റിപ്പോർട്ട് ചെയ്യപ്പെടാനുള്ള സാധ്യത കൂടുതലാണെന്നും അധികൃതർ പറയുന്നു.

ജൂണ്‍ 30മുതല്‍ ജൂലൈ 13വരെ 11,136 കേസുകളാണ് ബെംഗളൂരു നഗരത്തില്‍ സ്ഥിരീകരിച്ചത്. ഇതിന്റെ RO റേറ്റ് 1.29 വെച്ച് കണക്കാക്കുകയാണെങ്കില്‍ 31,978 പേര്‍ കോവിഡ് ബാധിതരാവേണ്ടതാണ്. ഈ സമയത്തെല്ലാം രോഗബാധിതരുടെ എണ്ണം കൂടിയിരിക്കാമെന്നും ഡോ. ഗിരിജൻ ബാബു വ്യക്തമാക്കുന്നു. കൊവിഡ് വ്യാപനം രൂക്ഷമായിരുന്ന മാസങ്ങളിൽ രോഗബാധിതരുടെ എണ്ണം കൂടിയിരിക്കാമെന്നും വിദഗ്‌ധർ പറയുന്നു.

Also Read: സച്ചിൻ പൈലറ്റിനെതിരെ കടുംവെട്ടുമായി പാർട്ടി; 19 വിമതരെ അയോഗ്യരാക്കാൻ കോൺഗ്രസ്

കൊവിഡ് കേസുകൾ ഉയരുന്ന സംസ്ഥാനമാണ് കർണാടക. സംസ്ഥാനത്ത് സ്ഥിരീകരിച്ച കൊവിഡ് കേസുകളിൽ ഭൂരിഭാഗവും ബെംഗളൂരു നഗരത്തിൽ നിന്നുള്ളതാണ്. സംസ്ഥാനത്തേക്ക് എത്തിയവരിൽ പലർക്കും രോഗബാധ സ്ഥിരീകരിച്ചിരുന്നു. കണക്കുകൾ പ്രകാരം നഗരത്തിൽ 1.3 കോടി ആളുകളാണുള്ളത്. എന്നാൽ മറ്റ് സംസ്ഥാനങ്ങളിൽ നിന്ന് കുടിയേറിയവരും തൊഴിൽ തേടിയെത്തിയവരും ഈ കണക്കിൽ ഉൾപ്പെടാനുള്ള സാധ്യത കുറവാണ്.