ന്യൂഡല്ഹി: ബിജെപി നേതാവ് നൂപുര് ശര്മയെ അനുകൂലിച്ച് സമൂഹമാധ്യമങ്ങളില് പോസ്റ്റിട്ടതിന്റെ പേരില് രാജസ്ഥാനിലെ ഉദയ്പൂരില് തയ്യല്ക്കാരനെ കൊലപ്പെടുത്തിയ പ്രതികളെ വളഞ്ഞിട്ട് ആക്രമിച്ച് ജനക്കൂട്ടം. അഭിഭാഷകരടക്കം ഒരുകൂട്ടം ആളുകള് ചേര്ന്നാണ് പ്രതികളെ കയ്യേറ്റം ചെയ്തത്. ജയ്പ്പൂരിലെ എന്ഐഎ കോടതിയില് നിന്നും പ്രതികളെ പുറത്തേയ്ക്ക് കൊണ്ടുവരും വഴിയായിരുന്നു അപ്രതീക്ഷിത ആക്രമണം. കനത്ത പോലീസ് കാവലിലാണ് പ്രതികളെ എത്തിച്ചതെങ്കിലും ജനക്കൂട്ടം ഇരമ്പിയെത്തിയതോടെയ പോലീസും പാടുപെട്ടു. പ്രതികളെ 10 ദിവസത്തേയ്ക്ക് എന്ഐഎ കസ്റ്റഡിയില് വിട്ടിരിക്കുകയാണ്.
ആദ്യം കടയില് കയറുന്നവര്ക്ക് കൊലപാതകം നടത്താന് കഴിഞ്ഞില്ലെങ്കില് കൃത്യം നിര്വഹിക്കാന് പ്രതികള് രണ്ട് പേരെ കൂടി തയ്യാറാക്കി നിര്ത്തിയിരുന്നു. ഇവരും പിടിയിലായിട്ടുണ്ട്. പ്രധാനമന്ത്രി നരേന്ദ്രമോദിക്ക് നേരെയും പ്രതികള് ഭീഷണി മുഴക്കിയിരുന്നു. സമൂഹമാധ്യമത്തിലെ പോസ്റ്റിന്റെ പേരില് അയല്വാസികളില് നിന്നും തനിക്ക് ഭീഷണിയുണ്ടെന്ന് ചൂണ്ടിക്കാട്ടി കൊല്ലപ്പെട്ട കനയ്യ ലാല് പോലീസില് പരാതി നല്കിയിരുന്നു. ഒരാഴ്ചയായി കനയ്യ ലാല് കടയില് പോകാറില്ലായിരുന്നുവെന്നും വീണ്ടും കട തുറന്ന ദിവസമാണ് കൊലപാതകം നടന്നതെന്നും അദ്ദേഹത്തിന്റെ ഭാര്യ യശോദ വ്യക്തമാക്കി. ഉദയ്പൂര് കൊലപാതകത്തിന് ഒരാഴ്ച മുമ്പ് മഹാരാഷ്ട്രയിലെ അമരാവതിയില് മെഡിക്കല് ഷോപ്പ് ഉടമയെ കൊലചെയ്തതും നൂപുര് ശര്മയെ പിന്തുണച്ച് പോസ്റ്റിട്ടതിനാണെന്ന് പോലീസ് വ്യക്തമാക്കിയിട്ടുണ്ട്.