ആധാര്‍ കാര്‍ഡ് അധികം സ്മാര്‍ട്ടാക്കണ്ട; മുന്നറിയിപ്പുമായി യുഐഡിഎഐ

ആധാര്‍ കാര്‍ഡുകള്‍ പ്ലാസ്റ്റിക് ഷീറ്റിൽ പ്രിന്‍റ് ചെയ്യുന്നതിനും കാര്‍ഡ് രൂപത്തിലാക്കുന്നതിനുമെതിരെ ജനങ്ങള്‍ക്കു മുന്നറിയിപ്പുമായി യുണീക്ക് ഐഡന്‍റിഫിക്കേഷൻ അതോരിറ്റി ഓഫ് ഇന്ത്യ. ആധാര്‍ കാര്‍ഡിന്‍റെ പകര്‍പ്പ് പ്ലാസ്റ്റിക് കാര്‍ഡ് രൂപത്തിലാക്കി നല്‍കുന്ന കടകള്‍ നിരവധിയാണ്. പിവിസി സ്മാര്‍ട് കാര്‍ഡ് രൂപത്തിലാക്കിയാൽ കാര്‍ഡ് ഉപയോഗശൂന്യമാകുമെന്നാണ് മുന്നറിയിപ്പ്. പിവിസി കാര്‍ഡിൽ പ്രിൻ്റ് ചെയ്താൽ ആധാറിലെ ക്യൂആര്‍ കോഡ് വായിക്കാൻ സാധിക്കില്ലെന്നാണ് യുഐഡിഎഐ കാരണമായി പറയുന്നത്.

ഇതോടൊപ്പം പിവിസി സ്മാര്‍ട് കാര്‍ഡ് രൂപത്തിലേയ്ക്ക് ആധാര്‍ മാറ്റുന്നത് ആധാറിലെ വിവരങ്ങള്‍ ചോരുന്നതിനും കാരണമാകുമെന്നും യുഎഡിഎഐ പുറത്തിറക്കിയ കുറിപ്പിൽ പറയുന്നു.

പ്ലാസ്റ്റിക് കാര്‍ഡിൽ പ്രിന്‍റ് ചെയ്യുമ്പോള്‍ മിക്കപ്പോഴും ക്യൂആര്‍ കോഡ് സ്കാൻ ചെയ്യാൻ സാധിക്കാത്തതുമൂലം ആധാര്‍ സ്മാര്‍ട് കാര്‍ഡ് എന്നറിയപ്പെടുന്ന സംവിധാനം തികച്ചും ഉപയോഗശൂന്യമാണെന്നും യുഐഡിഎഐ സിഇഓ അജയ് ഭൂഷൺ പാണ്ഡെ പറഞ്ഞു. അതേസമയം യഥാര്‍ത്ഥ ആധാര്‍ കാര്‍ഡും ഡൗൺലോഡ് ചെയ്ത ശേഷം സാധാരണ പേപ്പറിൽ പ്രിൻ്റ് ചെയ്ത ആധാര്‍ കാര്‍ഡും എംആധാര്‍ കാര്‍ഡും തികച്ചും ഉപയോഗയോഗ്യമാണെന്നും അദ്ദേഹം പറഞ്ഞു.

ആധാര്‍ കാര്‍ഡ് കൈവശമുള്ള വ്യക്തിയ്ക്ക് ആ കാര്‍ഡ് ലാമിനേറ്റ് ചെയ്യുകയോ പ്ലാസ്റ്റിക് ആധാര്‍ കാര്‍ഡ് ഉണ്ടാക്കുകയോ ചെയ്യേണ്ടതില്ല. സ്മാര്‍ട് ആധാര്‍ കാര്‍ഡ് എന്നൊരു സംവിധാനം ഇല്ലെന്നും അദ്ദേഹം പറഞ്ഞു.

ആധാര്‍ കാര്‍ഡ് നഷ്ടപ്പെടുന്ന പക്ഷം യുഐഡിഎഐ വെബ്സൈറ്റിൽ നിന്നും ആധാര്‍ സൗജന്യമായി ഡൗൺലോഡ് ചെയ്യാം. ബ്ലാക്ക് ആന്‍റ് വൈറ്റ് ആണെങ്കിൽ പോലും കാര്‍ഡ് തികച്ചും ഉപയോഗപ്രദമാണ്.

ആധാര്‍ കാര്‍ഡിന്‍റെ പകര്‍പ്പ് ഉണ്ടാക്കുവാനായി ആധാര്‍ നമ്പര്‍ ആര്‍ക്കും കൈമാറരുതെന്നും യുഐഡിഎഐ അധികൃതര്‍ അറിയിച്ചു. ഉപഭോക്താക്കളിൽ നിന്നും വിവരങ്ങള്‍ ശേഖരിക്കരുതെന്ന് അംഗീകാരമില്ലാത്ത ഏജൻസികള്‍ ശ്രമിക്കരുതെന്നും അത് ക്രിമിനൽ കുറ്റമാണെന്നും അധികൃതര്‍ അറിയിച്ചു.