രാമക്ഷേത്രത്തിന് തറക്കല്ലിടാൻ രാഹുൽ ഗാന്ധിയെ ക്ഷണിച്ച് ഉമാ ഭാരതി

ന്യൂഡൽഹി: അയോധ്യയിൽ രാമക്ഷേത്രത്തിന് തറക്കല്ലിടാൻ കോൺഗ്രസ് അധ്യക്ഷൻ രാഹുൽ ഗാന്ധിയെ ക്ഷണിച്ച് ഉമാഭാരതിയുടെ വാക്കുകള്‍. തന്നോടൊപ്പം രാമക്ഷേത്രത്തിന് തറക്കല്ലിടുന്നതു വഴി കോൺഗ്രസിന് പാപമോചനം നേടാമെന്ന് ഉമാഭാരതി പിടിഐ അഭിമുഖത്തിൽ പറഞ്ഞു.

ലോകത്ത് ഏറ്റവുമധികം സഹിഷ്ണുതയുള്ളത് ഹിന്ദുക്കള്‍ക്കാണെന്നും എന്നാൽ രാമജന്മഭൂമിയായ അയോധ്യയിൽ എവിടെയെങ്കിലും മുസ്ലിം പള്ളി നിര്‍മിക്കുന്നത് സംബന്ധിച്ച സംസാരമുണ്ടായാൽ ഹിന്ദുക്കള്‍ അസഹിഷ്ണുക്കളാകുമെന്നും ഉമാ ഭാരതി പറഞ്ഞു.

മക്കയിൽ ഒരു ക്ഷേത്രമോ വത്തിക്കാനിൽ ഒരു മുസ്ലീം പള്ളിയോ ഇല്ലാത്തിടത്തോളം കാലം അയോധ്യയിൽ മുസ്ലിം പള്ളി വേണമെന്ന രീതിയിലുള്ള സംസാരം നീതിയുക്തമല്ലെന്ന് ഉമാ ഭാരതി അഭിപ്രായപ്പെട്ടു.തര്‍ക്കം കോടതിയ്ക്ക് പുറത്ത് തീര്‍ക്കണമെന്നും ഇതിനായി ഭരണ - പ്രതിപക്ഷ പാര്‍ട്ടികള്‍ കൂട്ടായ ചര്‍ച്ച നടത്തി തീരുമാനമെടുക്കണമെന്നും ഉമാ ഭാരതി ആവശ്യപ്പെട്ടു.