മുംബൈ: പ്രവാചകനെതിരായ വിവാദ പരാമര്ശം നടത്തിയ നൂപുര് ശര്മയെ പിന്തുണച്ചതിന്റെ പേരില് അമരാവതിയില് മെഡിക്കല് സ്റ്റോര് ഉടമയെ കൊലപ്പെടുത്തിയവരില് ഒരാള് അദ്ദേഹത്തിന്റെ സുഹൃത്തായിരുന്നുവെന്ന് സഹോദരന് മഹേഷ് കോല്ഹെയുടെ വെളിപ്പെടുത്തല്. പ്രതികളിലൊരാളായ യൂസഫ് ഖാന് കൊല്ലപ്പെട്ട ഉമേഷ് കോല്ഹെയുടെ സുഹൃത്തായിരുന്നുവെന്നാണ് ഇളയ സഹോദരന് മഹേഷ് പറയുന്നത്. ഉമേഷിന്റെ ശവസംസ്കാര ചടങ്ങിലടക്കം യൂസഫ് ഖാന് പങ്കെടുത്തിരുന്നു. മൃഗ ഡോക്ടറായായ യൂസഫ് ഖാനുമായി ഉമേഷ് കോല്ഹെയ്ക്ക് 2006 മുതല് പരിചയമുണ്ട്.
കേസിലെ മുഖ്യ ആസൂത്രകനായ ഇര്ഫാന് പണവും സുരക്ഷിതമായി രക്ഷപെടാനുള്ള മാര്ഗവും വാഗ്ദാനം ചെയ്ത് 5 പേരെ കൂടി കൊലപാതകത്തില് ഉള്പ്പെടുത്തുകയായിരുന്നു. എല്ലാവരും അമരാവതി സ്വദേശികള് തന്നെയാണ്. സംഭവവുമായി ബന്ധപ്പെട്ട് ഇതുവരെ 7 പേരാണ് പിടിയിലായിട്ടുള്ളത്. ജൂണ് 21-ാം തീയതിയാണ് മെഡിക്കല് സ്റ്റോര് ഉടമയായ ഉമേഷ് കൊല്ഹെ കൊല്ലപ്പെട്ടത്. രാജസ്ഥാനിലെ ഉദയ്പൂരില് തയ്യല്ക്കാരനായ കനയ്യ ലാലിന്റെ കൊലപാതകത്തിന് ഒരാഴ്ച മുമ്പാണ് അമരാവതിയിലെ കൊലപാതകം. രാത്രിയില് കടയടച്ച് വീട്ടിലേക്ക് പോവുകയായിരുന്ന ഉമേഷ് കൊല്ഹയെ ബൈക്കിലെത്തിയ അക്രമികള് ക്രൂരമായി വെട്ടിക്കൊലപ്പെടുത്തുകയായിരുന്നു. ഉമേഷ് കൊല്ഹയുടെ തലച്ചോറിലും കണ്ണിലും ശ്വാസനാളിയിലും അടക്കം ഗുരുതരമായ മുറിവുകളേറ്റിരുന്നു.