കേന്ദ്രമന്ത്രിയും എൽജെപി നേതാവുമായ രാം വിലാസ് പാസ്വാൻ അന്തരിച്ചു

ന്യൂഡൽഹി: കേന്ദ്ര മന്ത്രിയും ലോക് ജനശക്തി പാർട്ടി (എൽജെപി) നേതാവുമായ രാം വിലാസ് പാസ്വാൻ (74) അന്തരിച്ചു. ഏറെക്കാലമായി അസുഖബാധിതനായിരുന്ന അദ്ദേഹം അടുത്തയിടെ ഹൃദയമാറ്റ ശസ്ത്രക്രിയയ്ക്ക് വിധേയനായിരുന്നു. മകൻ ചിരാഗ് പാസ്വാനാണ് പിതാവിന്റെ വിയോഗ വാർത്ത ട്വീറ്റ് ചെയ്തത്. ബിഹാർ നിയമസഭാ തെരഞ്ഞെടുപ്പിന് തൊട്ട് മുമ്പാണ് എൽജെപി നേതാവിന്റെ വിയോഗം.

"പപ്പാ നിങ്ങൾ ഈ ലോകത്ത് ഇല്ലെന്ന് അറിയാം. എന്നാൽ നിങ്ങൾ എവിടെയാണെങ്കിലും എന്നോടൊപ്പം ഉണ്ടാകുമെന്ന് അറിയാം. മിസ് യു പപ്പാ." ചിരാഗ് ട്വീറ്റ് ചെയ്തു. പിതാവിനോടൊപ്പമുള്ള ബാല്യകാല ചിത്രം പങ്കുവെച്ചുകൊണ്ടാണ് പിതാവിന്റെ മരണ വാർത്ത ചിരാഗ് ട്വീറ്റ് ചെയ്തത്.


നരേന്ദ്ര മോദി മന്ത്രിസഭയിൽ ഭക്ഷ്യം, പൊതുവിതരണം, ഉപഭോക്തൃകാര്യം വകുപ്പുകളുടെ ചുമതലയുള്ള മന്ത്രിയായിരുന്നു രാം വിലാസ് പാസ്വാൻ. പാർട്ടി യോഗത്തിൽ പങ്കെടുക്കുന്നതിന്റെ തൊട്ടു മുമ്പ് അസ്വസ്ഥതകൾ പ്രകടിപ്പിച്ചതിനെത്തുടർന്നാണ് ഡൽഹിയിലെ സ്വകാര്യ ആശുപത്രിയിൽ പ്രവേശിപ്പിച്ചത്.