കേന്ദ്രമന്ത്രി നിതിൻ ഗഡ്കരിയ്ക്ക് കൊവിഡ് 19 സ്ഥിരീകരിച്ചു

ന്യൂഡൽഹി: കേന്ദ്രമന്ത്രി നിതിൻ ഗഡ്കരിയ്ക്ക് കൊവിഡ് 19 സ്ഥിരീകരിച്ചു. രോഗം സ്ഥിരീകരിച്ച വിവരം കേന്ദ്രമന്ത്രി തന്നെയാണ് ട്വിറ്ററിലൂടെ പുറത്തു വിട്ടത്. ക്ഷീണം അനുഭവപ്പെട്ടതിനെത്തുടര്‍ന്ന് ഡോക്ടറുടെ സഹായത്തോടെ കൊവിഡ് പരിശോധന നടത്തിയെന്നും രോഗം സ്ഥിരീകരിക്കുകയായിരുന്നുവെന്നും നിതിൻ ഗഡ്കരി ട്വീറ്റ് ചെയ്തു.

"ഇന്നലെ ക്ഷീണം തോന്നിയതിനെത്തുടര്‍ന്ന് ഡോക്ടറെ കാണുകയായിരുന്നു. മെഡിക്കൽ പരിശോധനയ്ക്കിടെയാണ് കൊവിഡ് 19 പോസിറ്റീവാണെന്ന് സ്ഥിരീകരിച്ചത്. എല്ലാവരുടെയും അനുഗ്രഹങ്ങളും ആശംസകളും മൂലം ഞാൻ ഇപ്പോള്‍ സുഖമായിരിക്കുന്നു. ഞാൻ സ്വയം ക്വാറൻ്റൈനിൽ പ്രവേശിച്ചിട്ടുണ്ട്." നിതിൻ ഗഡ്കരി ട്വീറ്റ് ചെയ്തു. താനുമായി സമ്പര്‍ക്കത്തിൽ വന്ന എല്ലാവരും പ്രോടോകോള്‍ പാലിക്കണമെന്നും സൂക്ഷിക്കണമെന്നും കേന്ദ്രമന്ത്രി പിന്നാലെ ട്വിറ്ററിൽ കുറിച്ചു.


മുൻപ് കേന്ദ്ര ആഭ്യന്തരമന്ത്രി അമിത് ഷായ്ക്ക് കൊവിഡ് 19 സ്ഥിരീകരിച്ചിരുന്നു. രോഗമുക്തനായ ശേഷവും അദ്ദേഹത്തെ തുടര്‍ചികിത്സയ്ക്കായി ആശുപത്രിയിൽ പ്രവേശിപ്പിച്ചിരുന്നു. മൺസൂൺകാല പാര്‍ലമെന്‍റ് സമ്മേളനം നടക്കുന്നതിനിടെയാണ് നിതിൻ ഗഡ്കരിയ്ക്ക് വൈറസ് ബാധ സ്ഥിരീകരിക്കുന്നത്.