അറ്റുപോയ കാൽപാദം തലയിണയായി നൽകി യുപി ആശുപത്രി

ഝാൻസി: വാഹനാപകടത്തിൽപ്പെട്ട് കാൽപാദം അറ്റുപോയ യുവാവിനോട് ഉത്തര്‍പ്രദേശ് ഝാൻസി മെഡിക്കൽ കോളേജ് അധികൃതരുടെ കൊടുംക്രൂരത. അറ്റുപോയ കാൽപാദം അതേ രോഗിയ്ക്ക് തലയിണയായി വെച്ചു നൽകിയത് ആശുപത്രിയിൽ വൻപ്രതിഷേധത്തിനാണ് ഇടയാക്കിയത്.

പ്രദേശത്തെ ലചൂര പോലീസ് സ്റ്റേഷൻ പരിധിയിൽ വാഹനാപകടത്തിൽപ്പെട്ട ഘനശ്യാം എന്ന യുവാവാണ് ആശുപത്രി അധികൃതരുടെ ക്രൂരതയ്ക്കിരയായത്.സ്കൂള്‍ വിദ്യാര്‍ത്ഥികളുമായി പോകുകയായിരുന്ന ബസ് അപകടത്തിൽപ്പെട്ടപ്പോള്‍ ബസിലെ ക്ലീനറായിരുന്ന ഘനശ്യാമിന് ഗുരുതരമായി പരിക്കേൽക്കുകയായിരുന്നു. സംഭവത്തിൽ ആറു കുട്ടികള്‍ക്കും പരിക്കേറ്റിരുന്നു. അപകടത്തിൽ ഘനശ്യാമിന്‍റെ വലതു കാൽപാദം അറ്റുപോയി.

എന്നാൽ ആശുപത്രിയിലെത്തിയ ബന്ധുക്കള്‍ ഇയാളുടെ അറ്റുപോയ കാൽപാദം തലയിണയായി വെച്ചിരിക്കുന്നതാണ് കണ്ടത്. ബഹളമായതോടെ കാൽപാദം മാറ്റി പകരം തലയിണ വെച്ചു. കുറ്റക്കാര്‍ക്കെതിരെ അടിയന്തിര നടപടിയെടുക്കുമെന്ന് മെഡിക്കൽ കോളേജ് അധികൃതര്‍ അറിയിച്ചു. യുവാവിനെ മെഡിക്കൽ കോളേജിൽ നിന്ന് ഡിസ്ചാര്‍ജ് ചെയ്ത ശേഷം സ്വകാര്യ ആശുപത്രിയിൽ പ്രവേശിപ്പിച്ചു.