യുപി ഇനി പ്രശ്നപ്രദേശ് അല്ല ഉത്തര്‍ പ്രദേശ് യോഗി ആദിത്യനാഥ്

ലക്നൗ: ഉത്തര്‍ പ്രദേശ് ദരിദ്രസംസ്ഥാനമാണെന്ന കാഴ്ചപ്പാട് ഒരു പരിധിവരെ മാറ്റാനായെന്ന് മുഖ്യമന്ത്രി യോഗി ആദിത്യനാഥ്. ബുധനാഴ്ച മുതൽ ആരംഭിക്കുന്ന യുപി ഇന്‍വെസ്റ്റേഴ്സ് സമ്മിറ്റിന് നിക്ഷേപകരും വൻ വ്യവസായികളും കാണിക്കുന്ന താത്പര്യം ഇതിനു തെളിവാണെന്നും യോഗി പറഞ്ഞു.

ഗുജറാത്തിനെപ്പോലെ ഉത്തര്‍പ്രദേശിനെയും നിക്ഷേപ സൗഹൃദ സംസ്ഥാനമാക്കി മാറ്റുകയാണ് ലക്ഷ്യം. മുഖം നോക്കാതെ ക്രിമിനലുകൾക്കെതിരെ നടപടിയെടുത്തു. താൻ ക്രിമിനലല്ലെന്ന് വെളിപ്പെടുത്തുന്ന പ്ലക്കാ‍ര്‍ഡുകളുമായാണ് മിക്ക ക്രിമിനലുകളും ഇപ്പോള്‍ നടക്കുന്നതെന്നും യോഗി അവകാശപ്പെട്ടു.

യുപിയെക്കുറിച്ചുള്ള കാഴ്ചപ്പാടു മൂലം ബാങ്കുകള്‍ തങ്ങള്‍ക്കു വായ്പ തന്നു സഹായിച്ചില്ലെന്നും എന്നാൽ ഇനി യാചിക്കുകയല്ല, ജനങ്ങളുടെ മേൽ ഭാരം വരുത്താതെ ഇവിടെ നിന്ന് ഉണ്ടാക്കാനാണ് തീരുമാനമെന്നും അദ്ദേഹം കൂട്ടിച്ചേര്‍ത്തു. യുപി എന്നത് ഇപ്പോള്‍ ശരിക്കും ഉത്തര്‍ പ്രദേശ് ആണെന്നും പ്രശ്നപ്രദേശ് ആയിരിക്കില്ലെന്നും മുഖ്യമന്ത്രി പറഞ്ഞു.