കുടിയേറ്റ തൊഴിലാളികൾക്കായി 1000 ബസുകൾ; പ്രിയങ്കയുടെ നീക്കത്തിന് അനുമതി നൽകി യോഗി ആദിത്യനാഥ്

കുടിയേറ്റ തൊഴിലാളികളെ വീടുകളിൽ എത്തിക്കാൻ 1000 ബസുകൾ ഓടിക്കാൻ അനുമതി നൽകണമെന്ന കോൺഗ്രസ് നേതാവ് പ്രിയങ്കാ ഗാന്ധിയുടെ ആവശ്യം അംഗീകരിച്ച് ഉത്തർ പ്രദേശ് മുഖ്യമന്ത്രി യോഗി ആദിത്യനാഥ്. കോൺഗ്രസ് പാർട്ടിയുടെ നേതൃത്വത്തിലാണ് ബസുകൾ ഒരുക്കിയിരിക്കുന്നത്. പ്രിയങ്കാ ഗാന്ധിയുടെ പ്രൈവറ്റ് സെക്രട്ടറിക്ക് എഴുതിയ കത്തിൽ യുപി അഡീഷണൽ ചീഫ് സെക്രട്ടറിയാണ് അനുമതി നൽകുന്ന വിവരം അറിയിച്ചത്.

ബസുകളുമായി ബന്ധപ്പെട്ട വിവരങ്ങൾ നൽകാൻ സർക്കാർ ആവശ്യപ്പെട്ടിട്ടുണ്ട്. ഡ്രൈവർ, കണ്ടക്ടർ, യാത്രക്കാർ എന്നിവരുടെ വിശദാംശങ്ങളാണ് നൽകേണ്ടത്. അതിർത്തിയിൽ പരിശോധന നടത്തിയതിന് ശേഷമായിരിക്കും പുറത്ത് നിന്നുള്ളവരെ സംസ്ഥാനത്തേക്ക് കടത്തിവിടുക. ബസുകൾക്ക് അനുമതി നൽകണമെന്നാവശ്യപ്പെട്ട് ശനിയാഴ്ചയാണ് പ്രിയങ്ക ഗാന്ധി മുഖ്യമന്ത്രിക്ക് കത്ത് നൽകിയിരുന്നത്.

Also Read: സമീപ ജില്ലാ യാത്രകൾക്ക് പാസ് വേണ്ട; ഗതാഗത സംവിധാനത്തിൽ സർക്കാർ ഇളവുകൾ

ഉത്തർപ്രദേശിലേക്ക് വരികയായിരുന്ന ട്രക്ക് അപകടത്തിൽ പെട്ട് 24 കുടിയേറ്റ തൊഴിലാളികൾ മരിക്കുകയും 36 പേർക്ക് പരിക്കേൽക്കുകയും ചെയ്ത സംഭവത്തിന് ശേഷമായിരുന്നു പ്രിയങ്കയുടെ ഇടപെടൽ. കുടിയേറ്റ തൊഴിലാളികളുടെ സുരക്ഷയ്ക്ക് വലിയ പ്രാധാന്യം നൽകണമെന്ന് പ്രിയങ്ക പറഞ്ഞു.

Also Read: ഇങ്ങനെയും ഉണ്ടോ നായപ്രേമം; കല്യാണത്തിന് നായ്ക്കുട്ടിക്ക് മുത്തം കൊടുത്തിറങ്ങിയ അവളുടെ കഥ ഇതാണ്!!

രാജസ്ഥാനിൽ നിന്ന് ഉത്തർപ്രദേശിലേക്ക് കുടിയേറ്റ തൊഴിലാളികളെയും കൊണ്ട് വന്ന ബസുകൾക്ക് സംസ്ഥാനത്തേക്ക് കടക്കാൻ യുപി സർക്കാർ നേരത്തെ അനുമതി നൽകിയിരുന്നില്ല. കോൺഗ്രസ് ഏർപ്പാടാക്കിയ ബസുകൾ അതിർത്തിയിൽ തടഞ്ഞിട്ടിരുന്നു. ഇക്കാര്യത്തിലാണ് ഇപ്പോൾ അനുകൂലമായ തീരുമാനം ഉണ്ടായിരിക്കുന്നത്.