ശക്തിമാന് സ്മാരകമായി പ്രതിമ ഒരുക്കി പോലീസ്

ബിജെപി നേതാവിന്റെ മര്‍ദ്ദനത്തെ തുടര്‍ന്ന് മരണത്തിനു കീഴടങ്ങിയ ഉത്തരാഖണ്ഡ് പോലീസിലെ വെള്ളക്കുതിര ശക്തിമാന് സ്മാരകമായി പ്രതിമ ഒരുങ്ങുന്നു. ഉത്തരാഖണ്ഡ് പോലീസ് തന്നെയാണ് സ്മാരകം ഒരുക്കുന്നത്. ശക്തിമാന് മര്‍ദ്ദനമേറ്റ റിസ്പാന ചൗക്കില്‍ തന്നെയാണ് പ്രതിമ ഒരുങ്ങുന്നത്. ശക്തിമാന്റെ പ്രതിമയ്ക്ക് 400 കിലോയില്‍ അധികം തൂക്കമുണ്ട്. അഞ്ച് ലക്ഷം രൂപ ചിലവിട്ടാണ് പ്രതിമ നിര്‍മ്മാണം പൂര്‍ത്തിയാക്കുന്നത്.

ശക്തിമാന്റെ ഓര്‍മ്മയ്ക്കായി ഡെറാഡൂണ്‍ പോലീസിന്റെ കുതിരപ്പാളയത്തിന് ശക്തിമാന്‍ എന്ന പേര് നല്‍കിയിരുന്നു.

കഴിഞ്ഞ മാര്‍ച്ചിലാണ് ബിജെപി പ്രതിഷേധ മാര്‍ച്ചിനിടെ മസൂറി എംഎല്‍എ ഗണേഷ് ജോഷി ശക്തിമാന്റെ കാല് തല്ലിയൊടിച്ചത്. ഗുരുതരമായി പരുക്കേറ്റ കുതിരയുടെ കാല്‍ ശസ്ത്രക്രിയയിലൂടെ മുറിച്ച്‌ നീക്കിയെങ്കിലും ഒരു മാസത്തിനകം കുതിര മരണത്തിന് കീഴടങ്ങി.