മീന്‍ പൊതിയാന്‍ പ്ലാസ്റ്റിക്കിനു പകരം പച്ചിലകള്‍ ഉപയോഗിച്ച് വില്‍പ്പനക്കാരന്‍; വീഡിയോ വൈറല്‍

ഇത്‌നാനഗര്‍: മീന്‍ പൊതിയാന്‍ പ്ലാസ്റ്റിക്കിനു പകരം പച്ചിലകള്‍ ഉപയോഗിച്ച് മത്സ്യ വ്യാപാരി. അരുണാചല്‍ പ്രദേശിലെ ലെപാ രദാ ജില്ലയിലാണ് ഇത്തരത്തില്‍ വേറിട്ടൊരു സംഭവം. കേന്ദ്രമന്ത്രി കിരണ്‍ റിജ്ജു ആണ് വീഡിയോ ട്വിറ്ററില്‍ പങ്കുവെച്ചത്.

'നമ്മുടെ പ്രധാനമന്ത്രി പ്ലാസ്റ്റിക്ക് വസ്തുക്കള്‍ ഉപയോഗിക്കരുതെന്ന് പറഞ്ഞിട്ടുണ്ട്. പ്ലാസ്റ്റിക്കുകള്‍ ലഭ്യമല്ലാതാകുന്നതിനാല്‍ നാം പച്ചിലകള്‍ ഉപയോഗിക്കണം', വീഡിയോ ട്വിറ്ററില്‍ പോസ്റ്റ് ചെയ്തതോടൊപ്പം മന്ത്രി കുറിച്ചു.

59 സെക്കന്റ് ദൈര്‍ഘ്യമുള്ള വീഡിയോയില്‍ ഒരു മത്സ്യവ്യാപാരി മീന്‍ വില്‍ക്കുന്നതായി കാണാം. എന്നാല്‍ രസകരമായത് മറ്റൊന്നാണ്. പ്ലാസ്റ്റിക്കു കൊണ്ട് പൊതിയുന്നതിനു പകരം പച്ചിലകള്‍ കൊണ്ടാണ് ഇയാള്‍ മീന്‍ പൊതിയുന്നത്. മീന്‍പൊതി കെട്ടി വയ്ക്കാന്‍ മരത്തിലെ വള്ളിയും ഉപയോഗിക്കുന്നു. മീനുകള്‍ എളുപ്പത്തില്‍ പൊതിയാനായി ഇലകളും വള്ളികളും വില്‍പ്പനക്കാരന്റെ അടുത്തുതന്നെ വച്ചിരിക്കുന്നതായി വീഡിയോയില്‍ കാണാം.

ട്വിറ്ററില്‍ പങ്കുവെച്ച മറ്റൊരു ചിത്രത്തില്‍, ആദിവാസികള്‍ സാധനങ്ങള്‍ പൊതിയാന്‍ പൈന്‍ ഇലകള്‍ ഉപയോഗിച്ചതായി കാണാം.