മുതിര്‍ന്ന കോണ്‍ഗ്രസ് നേതാവ് പ്രിയ രഞ്ജന്‍ ദാസ് മുന്‍ഷി അന്തരിച്ചു

ന്യൂഡല്‍ഹി: മുതിര്‍ന്ന കോണ്‍ഗ്രസ് നേതാവും മുന്‍ കേന്ദ്രമന്ത്രിയുമായിരുന്ന പ്രിയ രഞ്ജന്‍ ദാസ് മുന്‍ഷി അന്തരിച്ചു. 72 വയസായിരുന്നു. പക്ഷാഘാതത്തെ തുടര്‍ന്ന് 2008 മുതല്‍ കോമയിലായിരുന്നു അദ്ദേഹം. പശ്ചിമ ബംഗാളില്‍ കോണ്‍ഗ്രസിന്റെ ജനപ്രിയ നേതാവായിരുന്നു ​മുന്‍ഷി.

കേന്ദ്ര പാര്‍ലമെന്ററി കാര്യ മന്ത്രിയായിരിക്കവേയാണ് മുന്‍ഷി രോഗബാധിതനാകുന്നത്. മസ്തിഷ്‌കത്തിന്റെ ഒരുഭാഗത്തേക്കുള്ള രക്തയോട്ടം നിലക്കുകയായിരുന്നു .പിന്നീട് ഇത്രയും വര്‍ഷം ട്രക്കിയോസ്റ്റോമി ട്യൂബിലൂടെയായിരുന്നു ശ്വസിച്ചിരുന്നത്. കുഴലിലൂടെയായിരുന്നു അദ്ദേഹത്തിന് ഭക്ഷണം നല്‍കിയിരുന്നത്.

മന്‍മോഹന്‍ സിങ് മന്ത്രിഭയില്‍ മന്ത്രിയായിരുന്നപ്പോള്‍ അശ്ലീല ചിത്രങ്ങള്‍ കാണിക്കുന്നുവെന്ന് ആരോപിച്ച് ഫാഷന്‍ ടിവി, എ എക്സ് എന്‍ ഉള്‍പ്പെടെയുളള വിദേശ ചാനലുകള്‍ നിരോധിച്ച് ഇദ്ദേഹം വാര്‍ത്താ പ്രാധാന്യം നേടിയിരുന്നു.

മുന്‍ഷി രോഗകിടക്കയില്‍ ആയതിനുശേഷം ഭാര്യ ദീപ ദാസ്മുന്‍ഷി രാഷ്ട്രീയത്തില്‍ സജീവമാകുകയും ലോക്‌സഭയിലേക്ക് മത്സരിച്ച് ജയിക്കുകയും യുപിഎ സര്‍ക്കാരില്‍ മന്ത്രിയാകുകയും ചെയ്തിരുന്നു.