മദ്യരാജാവ് വിജയ് മല്യ രണ്ടാമതും ലണ്ടനില്‍ അറസ്റ്റില്‍

ലണ്ടന്‍: മദ്യരാജാവ് വിജയ് മല്യ വീണ്ടും ലണ്ടനില്‍ അറസ്റ്റിലായി. പണം തട്ടിച്ച കേസില്‍ മല്യയെ ലണ്ടനില്‍ അറസ്റ്റ് ചെയ്‍തതായി ദൂരദര്‍ശന്‍ ആണ് റിപ്പോര്‍ട്ട് ചെയ്‍തത്. മല്യയെ ഇന്നുതന്നെ കോടതിയില്‍ ഹാജരാക്കുമെന്നാണ് വിവരം. ഇത് രണ്ടാം തവണയാണ് ലണ്ടനില്‍ സ്ഥിരതാമസമാക്കിയ മല്ല്യ അറസ്റ്റ് ചെയ്യപ്പെടുന്നത്.

ഇന്ത്യയിലെ വിവിധ ബാങ്കുകളില്‍നിന്നായി 9000 കോടിയോളം രൂപ വായ്‍പയെടുത്തശേഷം നാടുവിട്ട മല്യയെ പിടികിട്ടാ പുള്ളിയായി പ്രഖ്യാപിച്ചിട്ടുണ്ട്. കഴിഞ്ഞ വര്‍ഷം മാര്‍ച്ചില്‍ ഇന്ത്യ വിട്ട മല്യ അതിനുശേഷം ലണ്ടനില്‍ സ്ഥിരതാമസമാണ്. ഇയാളെ വിട്ടുകിട്ടാനായുള്ള നടപടികള്‍ ഇന്ത്യന്‍ സര്‍ക്കാര്‍ തുടങ്ങിയിട്ടുണ്ട്. ഇന്ത്യന്‍ സര്‍ക്കാരിന്‍റെ അഭ്യര്‍ത്ഥന അനുസരിച്ച് കഴിഞ്ഞ ഏപ്രില്‍ 18ന് സ്കോട്ട്ലാന്‍റ് യാര്‍ഡ് മല്യയെ അറസ്റ്റ് ചെയ്‍തിരുന്നു. തുടര്‍ന്ന് ജാമ്യത്തില്‍ വിടുകയും ചെയ്‍തു.

ബാങ്കുകളില്‍നിന്ന് കടമെടുത്തതില്‍ 6000 കോടിയിലധികം രൂപ മല്യ വിവിധ രാജ്യങ്ങളിലേക്ക് മാറ്റിയതായി സിബിഐയും എൻഫോഴ്‍സ്‍മെന്‍റ് ഡയറക്ടറേറ്റും അടുത്തിടെ കണ്ടെത്തിയിരുന്നു. അമേരിക്ക, ഇംഗ്ലണ്ട്, ഫ്രാന്‍സ്, അയര്‍ലന്‍റ് തുടങ്ങിയ വിവിധ രാജ്യങ്ങളിലേക്കാണ് 17 ബാങ്കുകളില്‍നിന്നായെടുത്ത തുക മാറ്റിയത്.

Vijay Mallya arrested in London

Liquor-barron Vijay Mallya was arrested in London for the second time in connection with a moneu laundering case.