ഇന്ത്യൻ ജയിലുകളിൽ പാറ്റയും പാമ്പും: വിജയ് മല്യ

ലണ്ടന്‍: ഇന്ത്യൻ ജയിലുകളിൽ സുരക്ഷയില്ലെന്നും വേണ്ടത്ര വൃത്തിയില്ലെന്നും മദ്യവ്യവസായി വിജയ് മല്യയുടെ പരാതി. ഇന്ത്യൻ ബാങ്കുകളിൽ നിന്ന് 9000 കോടി വായ്പയെടുത്ത് ബ്രിട്ടനിലേയ്ക്ക് മുങ്ങിയ മല്യയെ വിട്ടുനൽകാൻ ഇന്ത്യ നല്‍കിയ ഹര്‍ജിയെ എതിര്‍ത്തുകൊണ്ടാണ് ഇന്ത്യയിലെ ജയിലുകളുടെ ശോച്യാവസ്ഥ വിവരിച്ച് മല്യയുടെ ഹര്‍ജി.

ആര്‍തര്‍ റോഡ് ജയില്‍, ആലിപുര്‍ ജയില്‍, പുഴാല്‍ ജയില്‍ എന്നിവിടങ്ങളിലെ ശോച്യാവസ്ഥയാണ് ബ്രിട്ടനിലെ ജയിൽ വിദഗ്ധര്‍ ഡോ. അലൻ മിച്ചലിനെ ഹാജരാക്കി മല്യ വിശദീകരിച്ചത്. ഇന്ത്യൻ ജയിലുകളിൽ പാറ്റയുടെയും പാമ്പിന്‍റെയും ശല്യമുണ്ടെന്നും വേണ്ടത്ര ശുചിത്വമില്ലാത്ത ജയിലുകളിൽ തന്‍റെ ജീവനു ഭീഷണിയുണ്ടെന്നും മല്യ ചൂണ്ടിക്കാട്ടി.

കടുത്ത പ്രമേഹവും ഉറക്കമില്ലായ്മയും മറ്റ് ശാരീരികപ്രശ്നങ്ങളും തനിക്കുണ്ടെന്നും ഇന്ത്യൻ ജയിലുകളിൽ വേണ്ടത്ര ഡോക്ടര്‍മാരില്ലെന്നും മല്യ ചൂണ്ടിക്കാട്ടി. കേസില്‍ ജനുവരി 10നാണ് കോടതി അന്തിമ വാദം കേള്‍ക്കുന്നത്.