പണം മൊത്തം തിരിച്ചടയ്ക്കാം; തന്നെ സ്വീകരിക്കണമെന്ന് മല്യ

ന്യൂഡൽഹി: താൻ ബാങ്കുകളിൽ നിന്നെടുത്ത വായ്പ മുഴുവനായും തിരിച്ചടയ്ക്കാമെന്നും തന്നെ ദയവായി സ്വീകരിക്കമണമെന്നും വിവാവ വ്യവസായി വിജയ് മല്യയുടെ ട്വീറ്റുകള്‍. വായ്പ തിരിച്ചടവ് മുടങ്ങിയതിനു പിന്നാലെ രാജ്യം വിട്ട മല്യയെ ഇന്ത്യയ്ക്ക് കൈമാറണമെന്ന ഹര്‍ജിയിൽ ബ്രിട്ടീഷ് കോടതി വിധി പറയാൻ അഞ്ച് ദിവസം മാത്രം ശേഷിക്കെയാണ് മല്യയുടെ അപേക്ഷ. ഇതു സംബന്ധിച്ച് മൂന്ന് ട്വീറ്റുകളാണ് മല്യ പോസ്റ്റ് ചെയ്തത്.

പൊതുപണമാണ് പ്രധാനമെന്നും വായ്പ മുഴുവൻ തിരിച്ചടയ്ക്കാൻ തയ്യാറാണെന്നും വിജയ് മല്യ ആദ്യ ട്വീറ്റിൽ ചൂണ്ടിക്കാട്ടുന്നു. തന്നെ കൈമാറുന്നതും വായ്പ തിരിച്ചടയ്ക്കുന്നതും രണ്ട് വിഷയമാണെന്നും അത് നടക്കട്ടെയെന്നും മല്യ ട്വീറ്റിൽ കുറിച്ചു. തന്നെ സ്വീകരിക്കണമെന്ന് സര്‍ക്കാരിനോടും ബാങ്കുകളോടും മല്യ അഭ്യര്‍ത്ഥിച്ചു.

ക്രൂഡ് ഓയിൽ വില ബാരലിന് 140 ഡോളര്‍ വരെയെത്തിയപ്പോള്‍ മിക്ക എയര്‍ലൈനുകളെയും പോലെ കിങ്ഫിഷറിനും വലിയ ബാധ്യതയുണ്ടായെന്നും അങ്ങനെയാണ് വായ്പ തിരിച്ചടവ് മുടങ്ങിയതെന്നും മല്യ രണ്ടാമത്തെ ട്വീറ്റിൽ കുറിച്ചു. എന്നാൽ വായ്പാ തുക മുഴുവൻ തിരിച്ചടയ്ക്കാൻ തയ്യാറാണെന്നും അത് സ്വീകരിക്കണമെന്നും മല്യ ട്വീറ്റിൽ കുറിച്ചു.

മൂന്ന് ദശാബ്ദത്തോളം ഇന്ത്യയിലെ ഏറ്റവും വലിയ മദ്യക്കമ്പനിയെ നയിച്ച് സര്‍ക്കാര്‍ ഖജനാവിലേയ്ക്ക് ആയിരക്കണക്കിന് കോടി രൂപ താൻ സംഭാവനയായി നല്‍കിയിട്ടുണ്ടെന്നും കിങ്ഫിഷര്‍ എയര്‍ലൈൻസും ഇത്തരത്തിൽ സംസ്ഥാന സര്‍ക്കാരുകള്‍ക്ക് കോടികള്‍ നല്‍കിയിട്ടുണ്ടെന്നും മല്യ ചൂണ്ടിക്കാട്ടി.

വായ്പ തിരിച്ചടവ് മുടങ്ങിയതിനെത്തുടര്‍ന്ന് 2016 മാര്‍ച്ചിൽ രാജ്യം വിട്ട മല്യയെ തിരിച്ചു വേണമെന്ന് കഴിഞ്ഞ ഫെബ്രുവരിയിലാണ് ഇന്ത്യ ആവശ്യപ്പെട്ടത്. ഈ കേസിൽ നടപടികള്‍ പുരോഗമിക്കുകയാണ്. രാഷ്ട്രീയക്കാരും മാധ്യമങ്ങളും ചിത്രീകരിക്കുന്നതുപോലെ താൻ തട്ടിപ്പുകാരനല്ലെന്നും കര്‍ണാടക ഹൈക്കോടതിയിൽ താൻ പണം തിരിച്ചടയ്ക്കാമെന്ന് അറിയിച്ചിട്ടുള്ളതാണെന്നും മല്യ വ്യക്തമാക്കി. ഈ വര്‍ഷം ആദ്യം പ്രധാനമന്ത്രിയ്ക്ക് അയച്ച കത്തിലും ഇത് വിശദമാക്കിയിട്ടുണ്ടെന്നും മല്യ ചൂണ്ടിക്കാട്ടി.