പ്രധാനമന്ത്രി വിളിച്ച സര്‍വ്വകക്ഷി യോഗത്തിൽ പങ്കെടുക്കില്ലെന്ന് മമത ബാനര്‍ജി

കൊൽക്കത്ത: ഒരു രാജ്യം ഒരു തെരഞ്ഞെടുപ്പ് എന്ന വിഷയത്തിൻ്റെ ചര്‍ച്ചയ്ക്കായി പ്രധാനമന്ത്രി നരേന്ദ്രമോദി വിളിച്ച സര്‍വ്വ കക്ഷിയോഗത്തിൽ പങ്കെടുക്കില്ലെന്ന് പശ്ചിമ ബംഗാള്‍ മമത ബാനര്‍ജി. ഇതുമായി ബന്ധപ്പെട്ട് പാര്‍ലമെൻ്ററികാര്യ മന്ത്രി പ്രഹ്ലാദ് ജോഷിക്ക് മമത ബാനര്‍ജി കത്ത് അയച്ചു.

ഈ വിഷയം വിദഗ്ധരുമായി ചര്‍ച്ച നടത്തിയശേഷം മാത്രമേ പരിഗണിക്കാൻ സാധിക്കുകയുള്ളൂ. ഗൗരവമേറിയ വിഷയത്തിൽ തിടുക്കപ്പെട്ട് തീരുമാനം എടുക്കാൻ കഴിയില്ല. എല്ലാ രാഷ്ട്രീയ പാര്‍ട്ടികള്‍ക്കും നിലപാട് വ്യക്തമാക്കാൻ ആവശ്യമായ സമയം അനുവദിക്കണമെന്നും മമത കത്തിൽ ആവശ്യപ്പെടുന്നു. അതേസമയം മറ്റ് പ്രതിപക്ഷ പാര്‍ട്ടികളും ഒരു രാജ്യം ഒരു തെരഞ്ഞെടുപ്പിൽ എതിര്‍പ്പ് അറിയിച്ചുണ്ട്.

നേരത്തെ പ്രധാനമന്ത്രി വിളിച്ചുചേര്‍ത്ത നിതി ആയോഗ് യോഗത്തിലും മമത ബാനര്‍ജി പങ്കെടുത്തിരുന്നില്ല. സാമ്പത്തിക അധികാരങ്ങളില്ലാത്ത, സംസ്ഥാന പദ്ധതികളെ പിന്തുണയ്ക്കാൻ ശേഷിയില്ലാത്ത നിതി ആയോഗ് യോഗത്തിൽ പങ്കെടുക്കേണ്ട കാര്യമില്ലെന്നായിരുന്നു മമതയുടെ നിലപാട്. ജൂൺ 15നാണ് പ്രധാനമന്ത്രി അധ്യക്ഷനായ നിതി ആയോഗ് യോഗം വിളിച്ചത്.

സര്‍ക്കാര്‍ പദ്ധതിയുടെ ഉദ്ഘാടനത്തെ തുടര്‍ന്ന് തെലങ്കാന മുഖ്യമന്ത്രി കെ ചന്ദ്രശേഖരറാവുവും പാര്‍ട്ടി സ്ഥാപക ദിന തിരക്കുകള്‍ മൂലം ശിവസേനാ തലവൻ ഉദ്ധവ് താക്കറെയും നാളത്തെ യോഗത്തിൽ പങ്കെടുക്കില്ല.