മല്യയെ ഇന്ത്യയ്ക്ക് കിട്ടുമോ? ബ്രിട്ടീഷ് കോടതി വിധി ഇന്നറിയാം

ന്യൂഡൽഹി: വിവാദ വ്യവസായി വിജയ് മല്യയെ ഇന്ത്യയ്ക്ക് കൈമാറണമെന്ന കേസിൽ ലണ്ടനിലെ വെസ്റ്റ്മിൻസ്റ്റര്‍ കോടതി ഇന്ന് വിധി പറയും. 9000 കോടി രൂപയിലേറെ വായ്പയെടുത്ത് തിരിച്ചടവ് മുടങ്ങിയതിനെത്തുടര്‍ന്ന് രാജ്യം വിട്ട മല്യയെ തിരിച്ചു കിട്ടണമെന്നാണ് ഇന്ത്യയുടെ ആവശ്യം. കോടതി നടപടികള്‍ നിരീക്ഷിക്കുന്നതിനായി സിബിഐ സംഘവും എൻഫോഴ്സ്മെന്‍റ് ഡയറക്ടറേറ്റ് സംഘവും ലണ്ടനിലെത്തിയിട്ടുണ്ട്.

ജോയിന്‍റ് ഡയറക്ടര്‍ എ സായ് മനോഹറിന്‍റെ നേതൃത്വത്തിലാണ് സിബിഐ സംഘം ലണ്ടനിലെത്തിയിട്ടുള്ളത്. അഗസ്റ്റ വെസ്റ്റ്ലാൻഡ് ഹെലികോപ്റ്റര്‍ ഇടപാടിലെ ഇടനിലക്കാരൻ ക്രിസ്റ്റ്യൻ മിഷേലിനെ അറസ്റ്റ് ചെയ്ത് രാജ്യത്തെത്തിച്ചതും ഇതേ സംഘമാണ്. രണ്ട് വര്‍ഷമായി യുകെയിൽ തുടരുന്ന മല്യയെ വിട്ടുകിട്ടാൻ ഇന്ത്യ കഴിഞ്ഞ ഡിസംബര്‍ മുതല്‍ ശ്രമിക്കുന്നുണ്ട്.

വായ്പയുടെ മുതൽ തിരിച്ചടയ്ക്കാൻ തയ്യാറാണെന്നുംതന്നെ സ്വീകരിക്കണമെന്നും ആവശ്യപ്പെട്ട് മല്യ കഴിഞ്ഞ ദിവസം ട്വീറ്റ് ചെയ്തിരുന്നു. എന്നാൽ ഇതിനോട് ബാങ്കുകള്‍ക്ക് യോജിപ്പില്ല. അതേസമയം, പിടികിട്ടാപ്പുള്ളിയായി പ്രഖ്യാപിക്കാനും സ്വത്തുക്കള്‍ കണ്ടുകെട്ടാനും ഇഡി നല്‍കിയ അപേക്ഷ പരിഗണിക്കുന്നത് സ്റ്റേ ചെയ്യണമെന്ന ആവശ്യവുമായി മല്യ സുപ്രീം കോടതിയിൽ ഹര്‍ജി സമര്‍പ്പിച്ചിട്ടുണ്ട്.