വ്യത്യസ്ത കൊവിഡ് വാക്സിൻ സ്വീകരിച്ചാൽ എന്ത് സംഭവിക്കും: പഠനം

അമ്പതിന് മുകളിൽ പ്രായമുള്ളവരാണ് പരീക്ഷണത്തിൽ പങ്കെടുത്തത്. വാക്സിൻ സ്വീകരിച്ചവരിൽ കുറച്ച് ദിവസം നീണ്ടു നിൽക്കുന്ന തലവേദന, ക്ഷീണം തുടങ്ങിയവയാണ് അനുഭവപ്പെട്ടത്. വ്യത്യസ്ത വാക്സിൻ ഡോസുകൾ സ്വീകരിച്ച പത്ത് ശതമാനം പേരിലാണ് പാർശ്വഫലങ്ങൾ കാണപ്പെട്ടത്.

സന്നദ്ധ പ്രവർത്തകരിൽ ഫൈസറിന്റെ ഒരു ഡോസും ആസ്ട്രാ സെനക്കയുടെ ഡോസുമാണ് കുത്തിവെച്ചത്. ഫ്രാൻസിലാണ് പഠനം നടന്നത്. ഓക്സ്ഫഡ് യൂണിവേഴ്സിറ്റിയുടെ നേതൃത്വത്തിലായിരുന്നു പഠനം. ഹ്രസ്വകാല പാർശ്വഫലങ്ങൾ മാത്രമാണ് വാക്സിൻ സ്വീകരിച്ചവരിൽ അനുഭവപ്പെട്ടത്. വ്യത്യസ്തമായ വാക്സിൻ ഡോസുകൾ സ്വീകരിച്ചാൽ പാർശ്വഫലങ്ങൾ ഉണ്ടാകുമോയെന്ന ആശങ്ക നിലനിൽക്കെയാണ് പഠന റിപ്പോർട്ട് പുറത്ത് വന്നിരിക്കുന്നത്.

ഗുരുതര പാർശ്വഫലങ്ങൾ കണ്ടെത്തിയവരിൽ ദിവസങ്ങൾക്കുള്ളിൽ തന്നെ ഭേദമായെന്ന് ഗവേഷണത്തിന് നേതൃത്വം നൽകിയ ഓക്സ്ഫഡ് പീഡിയാട്രിക്സ് ആന്റ് വാക്സിനോളജി പ്രഫസർ മാത്യു സ്നോപ് പറഞ്ഞു. എന്നാൽ വ്യത്യസ്ത വാക്സിൻ സ്വീകരിച്ചാൽ അത് എത്രത്തോളം ഫലപ്രദമാണെന്ന് റിപ്പോർട്ടിൽ പറയുന്നില്ല. ഈ വിഷയത്തിൽ പഠനം പുരോഗമിക്കുകയാണെന്ന് മാത്യു പറഞ്ഞു.