എന്താണ് എൻഡമിക്?
വൈറസിനൊപ്പം ജീവിക്കാൻ ഒരു പ്രദേശത്തെ ജനങ്ങള്‍ പഠിക്കുന്ന ഘട്ടമാണ് എൻഡമിക് ഘട്ടം. സമൂഹത്തിലെ എല്ലാവരിലേയ്ക്കും വൈറസ് എത്തുന്ന എപിഡമിക് (പകര്‍ച്ചവ്യാധി) ഘട്ടത്തിൽ നിന്ന് വ്യത്യസ്തമാണിത്. എൻഡമിക് ഘട്ടത്തിൽ സമൂഹത്തിൽ പരിമിതമായ തോതിൽ മാത്രമാണ് രോഗവ്യാപനം നടക്കുക. ദ വയര്‍ വാര്‍ത്താ വെബ്സൈറ്റിന് അനുവദിച്ച അഭിമുഖത്തിലാണ് അവര്‍ ഇക്കാര്യങ്ങള്‍ വ്യക്തമാക്കിയത്.
പ്രതീക്ഷ
2022 അവസാനത്തോടു കൂടി ലോകത്ത് കൊവിഡിനു ശേഷം ലോകം സാധാരണനിലയിലാകുമെന്നു പ്രതീക്ഷിക്കുന്നതായി അവര്‍ പറഞ്ഞു. 70 ശതമാനത്തിലധികം ജനങ്ങള്‍ക്ക് രണ്ട് ഡോസ് വാക്സിൻ ലഭിക്കുന്നതോടെ രാജ്യങ്ങള്‍ക്ക് സാധാരണ നിലയിലേയ്ക്ക് മടങ്ങാനാകുമെന്ന് അവര്‍ വ്യക്തമാക്കി. കൊവിഡ് മൂന്നാം തരംഗം കുട്ടികളെ കാര്യമായി ബാധിക്കുമോ എന്ന കാര്യത്തിൽ രക്ഷിതാക്കള്‍ ആശങ്കപ്പെടേണ്ടതില്ലെന്ന് സൗമ്യ സ്വാമിനാഥൻ പറഞ്ഞു. കുട്ടികളെ കൊവിഡ് ഗുരുതരാവസ്ഥയിലെത്തിക്കാനുള്ള സാധ്യത തീരെ കുറവാണെന്നും എന്നാൽ കുട്ടികളിൽ നിന്ന് മുതിര്‍ന്നവരിലേയ്ക്ക് രോഗം എത്താനുള്ള സാധ്യതയുണ്ടെന്നാണ് മറ്റു രാജ്യങ്ങളിലെ പഠനങ്ങള്‍ സൂചിപ്പിക്കുന്നതെന്നും അവര്‍ വ്യക്തമാക്കി. ആശങ്കപ്പെടേണ്ട സാഹചര്യമില്ലെന്നും എന്നാൽ മുന്നൊരുക്കങ്ങള്‍ നടത്തണമെന്നും സൗമ്യ സ്വാമിനാഥൻ പറഞ്ഞു.
കൊവാക്സിനും ഉടൻ അംഗീകാരം
ഇന്ത്യ തദ്ദേശീയമായി വികസിപ്പിച്ച കൊവാക്സിന് ലോകാരോഗ്യ സംഘടനയുടെ അനുമതി ലഭിക്കുമെന്നും അവര്‍ പ്രതീക്ഷ പ്രകടിപ്പിച്ചു. സെപ്റ്റംബര്‍ പകുതിയോടു കൂടി തന്നെ കൊവാക്സിന് അനുമതി ലഭിക്കുമെന്നും ഇതോടെ ആഗോള അംഗീകാരം നേടിയ വാക്സിനുകളുടെ പട്ടികയിൽ കൊവാക്സിനും ഇടംപിടിക്കുമെന്നും സൗമ്യസ്വാമിനാഥൻ അറിയിച്ചു. ഹൈഡ്രോക്സി ക്ലോറോക്വിൽ, ഐവര്‍മെക്ടിൻ, റെംഡിസിവിര്‍ തുടങ്ങിയ മരുന്നുകളൊന്നും കൊവിഡിനെിരെ വലിയ ഗുണം ചെയ്യുന്നില്ലെന്നാണ് ഇതുവരെ കണ്ടെത്തിയിട്ടുള്ളതെന്ന് അവര്‍ പറഞ്ഞു. ഗുരുതരാവസ്ഥയിലുള്ള രോഗികള്‍ക്ക് ഓക്സിജൻ നല്‍കുന്നതും ഡെക്സാമെത്തസോൺ എന്ന മരുന്നു നല്‍കുന്നതുമാണ് ഇതുവരെ ഗുണമുണ്ടാക്കിയിട്ടുള്ളതെന്നും സൗമ്യ സ്വാമിനാഥൻ വ്യക്തമാക്കി.