ഹാഥ്രസ് കേസ് പ്രത്യേക അന്വേഷണ സംഘത്തിലെ ഡിഐജിയുടെ ഭാര്യ ആത്മഹത്യ ചെയ്ത നിലയിൽ

ലഖ്നൗ: ഹാഥ്രസ് കേസ് അന്വേഷിക്കുന്ന പ്രത്യേക സംഘത്തിലെ (എസ്ഐടി) ഐപിഎസ് ഓഫീസറുടെ ഭാര്യ ആത്മഹത്യ ചെയ്ത നിലയിൽ. മൂന്നംഗ അന്വേഷണ സംഘത്തിലെ ഉദ്യോഗസ്ഥനായ ഡിഐജി ചന്ദ്ര പ്രകാശിന്‍റെ ഭാര്യ പുഷ്പ പ്രകാശിനെയാണ് ലഖ്നൗവിലെ വീട്ടിൽ ആത്മഹത്യ ചെയ്ത നിലയിൽ കണ്ടെത്തിയതെന്ന് ദേശീയ മാധ്യമമായ 'ഇന്ത്യ ടുഡേ'യാണ് റിപ്പോർട്ട് ചെയ്തത്.

ലഖ്‌നൗവിലെ സുശാന്ത് ഗോൾഫ് സിറ്റി പ്രദേശത്തെ വീട്ടിൽ സീലിങ്ങ് ഫാനിൽ തൂങ്ങിയ നിലയിലാണ് 36കാരിയായ പുഷ്പയെ കണ്ടെത്തിയത്. കുടുംബാംഗങ്ങൾ ഉടൻതന്നെ ഇവരെ ആശുപത്രിയിലേക്ക് കൊണ്ടുപോയെങ്കിലും ഡോക്ടർമാർ മരണം സ്ഥിരീകരിക്കുകയായിരുന്നു. പുഷ്പ പ്രകാശിന്‍റെ മരണത്തിൽ പോലീസ് അന്വേഷണം ആരംഭിച്ചിട്ടുണ്ട്.

Also Read : പ്രതിദിന രോഗബാധയിൽ ഇന്നും മുന്നിൽ കേരളം; മഹാരാഷ്ട്രയിൽ 6,417 പേർക്ക് കൂടി കൊവിഡ്

പുഷ്പ പ്രകാശ് ആത്മഹത്യ ചെയ്തതായി കുടുംബാംഗങ്ങളാണ് അറിയിച്ചതെന്നും സംഭവത്തിൽ അന്വേഷണം നടക്കുകയാണെന്നും ഡിസിപി ചാരു നിഗം പറഞ്ഞു. സ്ഥലത്ത് നിന്ന് ആത്മഹത്യക്കുറിപ്പ് കണ്ടെടുത്തിട്ടില്ലെന്നും അദ്ദേഹം പറഞ്ഞതായി റിപ്പോർട്ടിലുണ്ട്.

പുഷ്പയുടെ ഭർത്താവ് ചന്ദ്ര പ്രകാശ് 2005 ബാച്ച് ഐപിഎസ് ഉദ്യോഗസ്ഥനാണ്. ഹാഥ്രസിൽ പത്തൊമ്പതുകാരി ക്രൂരതയ്ക്കിരയായി കൊല്ലപ്പെട്ടെന്ന സംഭവം അന്വേഷിക്കാൻ യുപി സർക്കാർ നിയോഗിച്ച മൂന്നംഗ അന്വേഷണ സംഘത്തിൽ ചന്ദ്ര പ്രകാശും ഉൾപ്പെട്ടിരുന്നു.

Also Read : 'ഗുപ്കർ പ്രഖ്യാപനം ബിജെപി വിരുദ്ധമാണ്, ദേശവിരുദ്ധമല്ല'; കശ്മീർ സഖ്യത്തെ ഫറൂഖ് അബ്ദുള്ള നയിക്കും

പ്രാദേശിക ഭരണകൂടവും പോലീസും ചേർന്ന് പെൺകുട്ടിയുടെ മൃതദേഹം രാത്രിയിൽ സംസ്‌കരിച്ചുവെന്ന കുടുംബാംഗങ്ങളുടെ പരാതിയ്ക്ക് പിന്നാലെയായിരുന്നു സർക്കാർ പ്രത്യേക അന്വേഷണസംഘത്തെ നിയോഗിച്ചത്. പിന്നീട് യുപി സർക്കാർ സംഭവത്തിൽ സിബിഐ അന്വേഷണം ശുപാർശ ചെയ്യുകയായിരുന്നു.

(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല, നിങ്ങള്‍ ഒറ്റയ്ക്കല്ല. സഹായം തേടാം ഉടനെ. ദയവായി വിളിക്കൂ: ദിശ ഹെല്‍പ്പ്‍ലൈന്‍ - 1056 (ടോള്‍ ഫ്രീ)