നദീ ജലം പാകിസ്താനിലേക്ക് പോകുന്നത് തടയാന്‍ അണക്കെട്ടുകള്‍ നിര്‍മ്മിക്കും: ഗഡ്കരി

റോഹ്തക്: ഇന്ത്യന്‍ നദികളില്‍ നിന്നുളള ജലം പാകിസ്താനിലേക്കൊഴുകുന്നത് തടയാന്‍ മൂന്ന് അണക്കെട്ടുകള്‍ നിര്‍മ്മിക്കുമെന്ന് കേന്ദ്ര ഗതാഗത മന്ത്രി നിതിന്‍ ഗഡ്കരി. മൂന്ന് നദികളില്‍ നിന്നുളള ജലമാണ് ഇന്ത്യയില്‍ നിന്ന് പാകിസ്താനിലേക്ക് ഒഴുകുന്നത്. റോഹ്തക്കില്‍ നടന്ന കര്‍ഷക നേതൃസമ്മേളനത്തില്‍ സംസാരിക്കുകയായിരുന്നു അദ്ദേഹം

1960ല്‍ ഇന്ത്യയും പാകിസ്താനും തമ്മില്‍ ഒപ്പുവച്ച ഇന്‍ഡസ് വാട്ടര്‍ ട്രീറ്റി അനുസരിച്ച് മൂന്നു നദികളില്‍ നിന്നുള്ള ജലം ഇരുരാജ്യത്തിനും പങ്കിട്ടെടുക്കാവുന്നതാണ്. എന്നാല്‍ നദീജലം കാര്യക്ഷമമായി ഉപയോഗിക്കാത്തതിനാല്‍ ഇന്ത്യയ്ക്ക് അവകാശപ്പെട്ട ജലവും ഇപ്പോള്‍ വിനിയോഗിക്കുന്നത് പാകിസ്താനാണ്.

ഈ സ്ഥിതിക്ക് മാറ്റം വരുത്താന്‍ ഉത്തരാഖണ്ഡില്‍ മൂന്ന് അണക്കെട്ടുകള്‍ നിര്‍മിക്കാനാണ് കേന്ദ്രസര്‍ക്കാരിന്റെ തീരുമാനം. സംഭരിക്കുന്ന ജലം പഞ്ചാബ്, ഹരിയാന എന്നിവിടങ്ങളിലെ കൃഷിയിടങ്ങളിലേയ്ക്ക് നല്‍കാനാണ് പദ്ധതിയെന്നും മന്ത്രി പറഞ്ഞു.