ജനങ്ങളുടെ അവകാശങ്ങളെ ഹനിക്കാൻ അനുവദിക്കില്ലെന്ന് കോടതി

മുംബൈ: രാജ്യത്ത് അഭിപ്രായ സ്വാതന്ത്ര്യം നഷ്ടപ്പെടുന്നുവെന്ന നിരീക്ഷണവുമായി ബോംബെ ഹൈക്കോടതി. വ്യത്യസ്‌ത അഭിപ്രായം പറയുകയും സിനിമകൾ നിർമിക്കുകയും ചെയ്യുന്നവർക്കെതിരെ വധഭീഷണി മുഴുക്കുന്ന രജ്യത്തിന്‍റെ അവസ്ഥ എന്തായി തീരുമെന്നും കോടതി ചോദിച്ചു.

നരേന്ദ്ര ധാബോൽക്കറുടെയും ഗോവിന്ദ് പൻസാരെയുടെയും കൊലപാതകങ്ങളിൽ ഏജൻസികൾ നടത്തുന്ന അന്വേഷണം നിരീക്ഷിക്കണമെന്ന് ആവശ്യപ്പെട്ട് ബന്ധുക്കൾ നൽകിയ ഹർജി പരിഗണിക്കവെയാണ് കോടതിയുടെ നിരീക്ഷണം.പത്മാവതി എന്ന സിനിമയിൽ അഭിനയിച്ച നടി ദീപിക പദുകോണിനെ വധിക്കുന്നവര്‍ക്ക് പാരിതോഷികം പ്രഖ്യാപിച്ച സാഹചര്യം കോടതി ചൂണ്ടികാട്ടി.

വ്യത്യസ്ത അഭിപ്രായം പ്രകടിപ്പിക്കുന്നവരെ ഇല്ലാതാക്കുമെന്നുള്ള ഒരു വിഭാഗത്തിന്‍റെ വാദം എങ്ങനെ അംഗീകരിക്കാൻ കഴിയുമെന്ന് കോടതി ചോദിച്ചു. ജനങ്ങളുടെ ഭരണഘടനാപരമായ അവകാശത്തെ ഹനിക്കാൻ ആരെയും അനുവദിക്കില്ലെന്നും കോടതി വ്യക്തമാക്കി. ധാബോൽക്കറുടെയും പൻസാരെയുടെയും കൊലപാതകങ്ങളിൽ സിഐഡി, സിബിഐ ഏജൻസികൾ നടത്തിയ അന്വേഷണം പരാജയമായിരുന്നെന്നും കോടതി വിമർശിച്ചു.