പാര്‍ലമെൻ്റിൻ്റെ ശൈത്യകാല സമ്മേളനം ഇന്ന് മുതൽ

ന്യൂഡല്‍ഹി: പാര്‍ലമെൻ്റിൻ്റെ ശൈത്യകാല സമ്മേളനത്തിന് ഇന്ന് തുടക്കമാകും. ഇന്ന് ഇരു സഭകളും അന്തരിച്ച നേതാക്കള്‍ക്ക് ആദരാഞ്ജലിയര്‍പ്പിച്ച്‌ പിരിയും. ജനുവരി എട്ട് വരെ ഈ ശൈത്യകാല സമ്മേളനം ഉണ്ടാകും. ഇരുപത് ദിവസമാകും സഭ സമ്മേളിക്കുക. മുത്തലാക്ക് അടക്കം 43 ബില്ലുകളാണ് ഈ സമ്മേളനത്തില്‍ പട്ടികയിൽ ഉൾപ്പെടുത്തിയിട്ടുള്ളത്.

റഫാല്‍, ജെ.പി.സി, ആര്‍.ബി.ഐ ഗവര്‍ണര്‍ ഊര്‍ജിത് പട്ടേലിൻ്റെ രാജി, ഭരണഘടനാ സ്ഥാപനങ്ങളെ തകര്‍ക്കാനുള്ള കേന്ദ്ര നീക്കം, സി.ബി.ഐ, കര്‍ഷക പ്രശ്‌നങ്ങള്‍ തുടങ്ങിയവ പ്രതിപക്ഷം ഉയര്‍ത്തിക്കാട്ടും. ജിഎസ്ടി പ്രശ്നങ്ങള്‍, നോട്ട് നിരോധനം, ജമ്മു കശ്മീരിലെ തീവ്രവാദ നീക്കങ്ങള്‍ തുടങ്ങിയ വിഷയങ്ങള്‍ ഇരു സഭകളിലും ഉന്നയിക്കുമെന്ന് കോണ്‍ഗ്രസ് മുൻപ് വ്യക്തമാക്കിയിരുന്നു.

മുന്‍ സമ്മേളനങ്ങള്‍ക്ക് സമാനമായി ശൈത്യകാല സമ്മേളനത്തിലും പ്രതിപക്ഷ പ്രതിഷേധം ശക്തമാക്കാനാണ് തീരുമാനം. ശൈത്യകാല സമ്മേളനം വൈകിപ്പിച്ചതില്‍ പ്രതിപക്ഷം ശക്തമായ വിമര്‍ശനം വന്നതോടെയാണ് സര്‍ക്കാര്‍ തീയതികള്‍ പ്രഖ്യാപിച്ചത്. ഈ വിഷയത്തിലും പ്രതിപക്ഷം സഭയില്‍ പ്രതിപക്ഷം അസംതൃപ്തി അറിയിക്കാൻ സാധ്യതയുണ്ട്. ക്രിസ്തുമസ് പ്രമാണിച്ച് ഡിസംബര്‍ 25 ,26 തിയതികള്‍ സഭയ്ക്ക് അവധിയായിരിക്കും.