24 മണിക്കൂറിനിടെ 41,322 കൊവിഡ് കേസുകൾ
രാജ്യത്ത് കഴിഞ്ഞ 24 മണിക്കൂറിനിടെ 41,322 കൊവിഡ് കേസുകളാണ് സ്ഥിരീകരിച്ചത്. ഇതോടെ ആകെ കൊവിഡ് ബാധിതരുടെ എണ്ണം 93,51,110 ആയി ഉയർന്നിരിക്കുകയാണ്. 4,54,940 സജീവ രോഗികളാണ് നിലവിൽ രാജ്യത്തുള്ളത്. 87,59,969 പേർക്ക് രോഗമുക്തി ലഭിച്ചതായും ആരോഗ്യ മന്ത്രാലയം വ്യക്തമാക്കി. കഴിഞ്ഞദിവസം 41,452 പേരാണ് രോഗം ഭേദമായി ആശുപത്രി വിട്ടത്.
കൊവിഡ് മരണങ്ങൾ 1,36,200
രാജ്യത്ത് കഴിഞ്ഞ 24 മണിക്കൂറിനിടെ റിപ്പോർട്ട് ചെയ്ത കൊവിഡ് മരണങ്ങളിൽ നേരിയ കുറവ് മാത്രമാണ് ഉണ്ടായിരിക്കുന്നത്. കഴിഞ്ഞ 24 മണിക്കൂറിനിടെ 485 മരണമാണ് റിപ്പോര്ട്ട് ചെയ്തിരിക്കുന്നത്. ഇതോടെ രാജ്യത്തെ ആകെ കൊവിഡ് മരണങ്ങൾ 1,36,200 ആയി ഉയർന്നിരിക്കുകയാണ്. കഴിഞ്ഞ ഏതാനും ദിവസങ്ങളായി രാജ്യത്ത് റിപ്പോർട്ട് ചെയ്യുന്ന കൊവിഡ് മരണങ്ങളിലും കുറവ് അനുഭവപ്പെട്ടിരുന്നു.
കൊവിഡ് കണക്കുകൾ
മഹാരാഷ്ട്രയിൽ കൊവിഡ് കേസുകൾ വർധിക്കുന്നു
രാജ്യത്ത് ഏറ്റവുമധികം കൊവിഡ് കേസുകൾ റിപ്പോർട്ട് ചെയ്ത മഹാരാഷ്ട്രയിൽ ദിനം പ്രതിയുള്ള കേസുകൾ വർധിക്കുകയാണ്. കഴിഞ്ഞ 24 മണിക്കൂറിനിടെ സംസ്ഥാനത്ത് 6,185 പുതിയ കൊവിഡ് കേസുകളും 85 മരണങ്ങളുമാണ് റിപ്പോർട്ട് ചെയ്തത്. 4,089 പേർ രോഗമുക്തി നേടുകയും ചെയ്തു. 87,969 സജീവ കേസുകളാണ് നിലവിലുള്ളത്. ഇതോടെ സംസ്ഥാനത്തെ ആകെ കേസുകളുടെ എണ്ണം 18,08,550 ആയി. 16,72,627 പേർ രോഗമുക്തി നേടിയപ്പോൾ 46,898 പേർക്ക് ജീവൻ നഷ്ടമാകുകയും ചെയ്തു.
കേരളത്തിലെ കൊവിഡ് കേസുകൾ
കേരളത്തിൽ ഇന്നലെ 3966 പേർക്ക് രോഗബാധ സ്ഥിരീകരിച്ചപ്പോൾ 4544 പേർക്കാണ് രോഗമുക്തിയുണ്ടായത്. 23 മരണങ്ങൾ കൂടി സ്ഥിരീകരിച്ചതോടെ ആകെ മരണം 2171 ആയി ഉയരുകയും ചെയ്തു. കഴിഞ്ഞ 24 മണിക്കൂറിനിടെ സംസ്ഥാനത്ത് 39,108 സാമ്പിളുകളാണ് പരിശോധിച്ചത്. സംസ്ഥാനത്തെ വിവിധ ജില്ലകളിലായി 3,13,608 പേരാണ് ഇപ്പോള് നിരീക്ഷണത്തിലുള്ളത്. 63,885 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. 5,21,522 പേര് ഇതുവരെ കൊവിഡില് നിന്നും മുക്തി നേടി.