ആശ്വാസമേകി രാജ്യത്തെ പ്രതിദിന രോഗബാധ കുറയുന്നു; ആകെ കേസുകൾ 79 ലക്ഷം കടന്നു

രാജ്യത്ത് കഴിഞ്ഞ 24 മണിക്കൂറിനിടെ 45,149 കൊവിഡ് കേസുകളാണ് സ്ഥിരീകരിച്ചത്. ഇതോടെ ആകെ കൊവിഡ് ബാധിതരുടെ എണ്ണം 79,09,960 ആയി ഉയർന്നിരിക്കുകയാണ്. 6,53,717 ആക്ടീവ് കേസുകളാണ് നിലവിൽ രാജ്യത്തുള്ളത്. 71,37,229 പേർക്ക് രോഗമുക്തി ലഭിച്ചതായും ആരോഗ്യ മന്ത്രാലയം വ്യക്തമാക്കി. കഴിഞ്ഞദിവസം 59,105 പേരാണ് രോഗം ഭേദമായി ആശുപത്രി വിട്ടത്.

രാജ്യത്ത് കഴിഞ്ഞ 24 മണിക്കൂറിനിടെ റിപ്പോർട്ട് ചെയ്ത കൊവിഡ് മരണങ്ങളിലും കുറഞ്ഞിട്ടുണ്ട്. കഴിഞ്ഞ 24 മണിക്കൂറിനിടെ 480 മരണമാണ് റിപ്പോര്‍ട്ട് ചെയ്തിരിക്കുന്നത്. ഇതോടെ രാജ്യത്തെ ആകെ കൊവിഡ് മരണങ്ങൾ 1,19,014 ആയി ഉയർന്നിരിക്കുകയാണ്. കഴിഞ്ഞ ഏതാനും ദിവസങ്ങളായി രാജ്യത്ത് റിപ്പോർട്ട് ചെയ്യുന്ന കൊവിഡ് മരണങ്ങളിലും കുറവ് അനുഭവപ്പെടുന്നുണ്ടെന്നത് ആശ്വാസകരമാണ്.

രാജ്യത്ത് കഴിഞ്ഞ 24 മണിക്കൂറിനിടെ 9,39,309 സാമ്പിളുകളാണ് പരിശോധിച്ചത്. ഇതോടെ ഇതുവരെ നടത്തിയ പരിശോധനകളുടെ എണ്ണം 10,34,62,778 ആയി ഉയർന്നെന്ന് ഇന്ത്യൻ കൗൺസിൽ ഓഫ് മെഡിക്കൽ റിസർച്ച് വ്യക്തമാക്കി. കഴിഞ്ഞദിവസം 11,40,905 പരിശോധനകൾ നടത്തിയപ്പോൾ 50,129 കൊവിഡ് കേസുകളായിരുന്നു റിപ്പോർട്ട് ചെയ്തത്.

മഹാരാഷ്ട്രയിൽ ഇന്നലെ 6,059 പേർക്കാണ് കൊവിഡ് സ്ഥിരീകരിച്ചത്. 5,648 പേരാണ് കൊവിഡ് മുക്തി നേടിയതെന്നും സംസ്ഥാന ആരോഗ്യ വകുപ്പ് വ്യക്തമാക്കി. 112 മരണങ്ങളാണ് കഴിഞ്ഞദിവസം റിപ്പോർട്ട് ചെയ്തിരിക്കുന്നത്. ഇതോടെ സംസ്ഥാനത്ത് കൊവിഡ് സ്ഥീരീകരിച്ചവരുടെ ആകെ എണ്ണം 16,45,020 ആയി. 14,60,755 പേരാണ് രോഗത്തിൽ നിന്നും മുക്തി നേടിയത്. ആകെ 43,264 പേർക്കാണ് രോഗത്തെത്തുടർന്ന് ജീവൻ നഷ്ടമായത്. നിലവിൽ 1,40,486 ആക്ടിവ് കേസുകളാണ് സംസ്ഥാനത്തുള്ളത്.