വീണ്ടും ന്യൂനമർദ്ദം വരുന്നു; മൺസൂൺ കനക്കുമെന്ന് കാലാവസ്ഥാ വകുപ്പ്

ന്യൂഡൽഹി: ഉംപുനും നിസർഗയ്ക്കും ശേഷം ഇന്ത്യൻ ഉപഭൂഖണ്ഡത്തിൽ കനത്ത മഴയ്ക്ക് കാരണമായേക്കാവുന്ന അടുത്ത ന്യൂനമർദ്ദം രൂപപ്പെടുമെന്ന് കാലാവസ്ഥാകേന്ദ്രം. ബംഗാൾ ഉൾക്കടലിൽ രൂപപ്പെടുന്ന ന്യൂനമർദ്ദം ജൂൺ 10-11ഓടു കൂടി ഒഡീഷയോടു ചേർന്നു തീരം തൊടും. എന്നാൽ ഇത് ചുഴലിക്കാറ്റായി മാറാൻ സാധ്യത കുറവാണെന്ന് കാലാവസ്ഥാ കേന്ദ്രം അറിയിച്ചു.

Also Read: നിലപാട് മാറ്റി WHO; പൊതുസ്ഥലങ്ങളില്‍ മാസ്‍ക് നിര്‍ബന്ധം; 60 വയസ് കഴിഞ്ഞവര്‍ക്ക് മെഡിക്കല്‍ മാസ്‍ക്

പുതിയ ന്യൂനമർദ്ദത്തിൻ്റെ വരവോടെ മധ്യേന്ത്യൻ സംസ്ഥാനങ്ങളിലും വടക്കുകിഴക്കൻ സംസ്ഥാനങ്ങളിലും മൺസൂൺ ശക്തിപ്പെടും. ബംഗാൾ ഉൾക്കടലിൻ്റെ കിഴക്കൻ ഭാഗത്തോടു ചേർന്നായിരിക്കും പുതിയ ന്യൂനമർദ്ദം രൂപപ്പെടുക. അതേസമയം, ന്യൂനമർദ്ദം ഇതുവരെ രൂപപ്പെടാത്തതിനാൽ ഇതിൻ്റെ സഞ്ചാരപാത വ്യക്തമായി പ്രവചിക്കാനായിട്ടില്ലെന്നാണ് കാലാവസ്ഥാ വകുപ്പ് പറയുന്നത്. എന്നാൽ പുതിയ ന്യൂനമർദ്ദത്തിൻ്റെ വരവോടെ ജൂൺ 10 മുതൽ ഓഡീഷ ഉൾപ്പെടെയുള്ള സംസ്ഥാനങ്ങളിൽ മഴ കനക്കും. ജൂൺ 11, 12, 13 തീയതികളിൽ ഡൽഹി, ഉത്തർ പ്രദേശ് തുടങ്ങിയ കേന്ദ്രങ്ങളിൽ 50 മുതൽ 60 കിലോമീറ്റ‍ര്‍ വരെയുള്ള കാറ്റു വീശിയേക്കുമെന്നും റിപ്പോ‍ര്‍ട്ടുകളുണ്ട്.


സംസ്ഥാനത്ത് ഇത്തവണ ജൂൺ ഒന്നിനു തന്നെ കാലവര്‍ഷം ആരംഭിച്ചിരുന്നു. കേരളത്തിൽ ഒരാഴ്ചത്തെ മൺസൂൺ പിന്നിടുമ്പോൾ മുൻവ‍‍ര്‍ഷം ഇതേ കാലയളവിൽ ലഭിച്ചതിനെക്കാൾ അധികം മഴയാണ് ലഭിച്ചത്. സംസ്ഥാനത്തെ 9 ജില്ലകളിൽ ശക്തമായ മഴ ലഭിച്ചു. എന്നാൽ വരും ദിവസങ്ങളിൽ കേരളത്തിൽ കാലവ‍ര്‍ഷം ദു‍ര്‍ബലമായേക്കുമെന്നാണ് കാലാവസ്ഥാ റിപ്പോ‍ര്‍ട്ട്. ശനിയാഴ്ച അഞ്ച് ജില്ലകളിലും ഞായറാഴ്ച മൂന്ന് ജില്ലകളിലുമാണ് യെല്ലോ അല‍ര്‍ട്ട്.