യുവതിയെ ബലാത്സംഗം ചെയ്ത ശേഷം തീ കൊളുത്തി കൊന്നു

ലഖ‍്‍നൗ: ഉത്തർപ്രദേശിൽ വീണ്ടും രാജ്യത്തെ നടുക്കിയ കൂട്ട ബലാത്സംഗം. ഉത്തര്‍പ്രദേശിലെ സാംബാല്‍ ജില്ലയില്‍ അഞ്ച് പേർ ചേർന്ന് യുവതിയെ ബലാത്സംഗം ചെയ്ത ശേഷം തീ കൊളുത്തി കൊല്ലുകയായിരുന്നു. പുലർച്ചെ വീട്ടിൽ ഉറങ്ങിക്കിടക്കുകയായിരുന്ന 35കാരിയെയാണ് ക്രൂരമായി പീഡിപ്പിച്ച ശേഷം കൊന്നത്.

വീട്ടിൽ യുവതിയും രണ്ട് കുട്ടികളും മാത്രമാണ് ഉണ്ടായിരുന്നത്. ഭർത്താവ് വീട്ടിലില്ലെന്ന് മനസ്സിലാക്കിയാണ് അക്രമികൾ വീട്ടിനകത്ത് അതിക്രമിച്ച് കയറിയത്. അവശയായ യുവതിയെ സംഘം ആദ്യം വീട്ടിനുള്ളിൽ ഉപേക്ഷിച്ച് പോയി. ഈ സമയത്ത് ഇവർ ഭർത്താവിനെയും ബന്ധുക്കളെയും ഫോണിൽ വിളിക്കാൻ ശ്രമിച്ചെങ്കിലും കിട്ടിയില്ല.

പിന്നീട് മറ്റൊരു ബന്ധുവിനോട് കാര്യങ്ങൾ പറഞ്ഞു. എന്നാൽ ഇതിനിടെ വീണ്ടും വീട്ടിലെത്തിയ അക്രമിസംഘം യുവതിയെ തൊട്ടടുത്ത ക്ഷേത്രപരിസരത്ത് വെച്ച് തീയിട്ട് കൊല്ലുകയായിരുന്നുവെന്ന് ടൈംസ് ഓഫ് ഇന്ത്യ റിപ്പോ‍ർട്ട് ചെയ്യുന്നു

യുവതിയെ കൊന്ന ശേഷം പ്രതികൾ രക്ഷപ്പെട്ടു. സംഭവവുമായി ബന്ധപ്പെട്ട് അഞ്ച് പേർക്കെതിരെ പോലീസ് കേസെടുത്തിട്ടുണ്ട്. പ്രതികളെയെല്ലാം തിരിച്ചറിഞ്ഞിട്ടുണ്ട്.