ചെന്നൈ: വിവാഹത്തട്ടിപ്പ് കേസിൽ യുവതി പിടിയിൽ. തമിഴ്നാട്ടിലെ മധുര സ്വദേശിയായ സന്ധ്യ (27) ആണ് അറസ്റ്റിലായത്. വിവാഹത്തട്ടിപ്പിന് യുവതിക്ക് സഹായം ചെയ്ത് നൽകിയിരുന്ന മൂന്ന് പേരും അറസ്റ്റിലായി. തമിഴ്നാട്ടിലെ നാമക്കലിൽ നിന്നാണ് സംഘം പിടിയിലായത്. എല്ലാവരുടെയും അറസ്റ്റ് രേഖപ്പെടുത്തിയതായി പോലീസിനെ ഉദ്ധരിച്ച് പ്രാദേശിക മാധ്യമങ്ങൾ റിപ്പോർട്ട് ചെയ്തു.
അറസ്റ്റിലായത് മൂന്ന് പേർ
വിവാഹത്തട്ടിപ്പ് കാരിയായ സന്ധ്യ ഉൾപ്പെടെ മൂന്ന് പേരുടെ അറസ്റ്റ് പോലീസ് രേഖപ്പെടുത്തി. എൻ ഗൗതം (26), ജയവേൽ (30) ധനലക്ഷമി (45) എന്നിവരാണ് അറസ്റ്റിലായ മറ്റുള്ളവർ. വിവാഹ ബ്രോക്കറായ ധനലക്ഷമിയുടെ സഹായത്തോടെയാണ് സന്ധ്യ വിവാഹത്തട്ടിപ്പ് നടത്തിയത്. വിവാഹത്തിന് യുവതിയുടെ സഹായിയായി എത്തിയിരുന്നവരാണ് ഗൗതവും ജയവേലും. യുവതിയും സംഘവും പിടിയിലായ സംഭവത്തിൽ വിശദമായ അന്വേഷണം നടത്തുമെന്ന് പോലീസ് വ്യക്തമാക്കി.
സ്വർണവും പണവുമായി കടന്നു
ആറാമത്തെ വിവാഹത്തിന് ശേഷമാണ് സന്ധ്യയും സംഘവും പിടിയിലായത്. സെപ്റ്റംബർ ഏഴാം തീയതി പരമെത്തിവെലൂർ സ്വദേശി ധനബാലനുമായി സന്ധ്യയുടെ വിവാഹം നടന്നു. വിവാഹം കഴിഞ്ഞ് മൂന്നാം ദിവസം സന്ധ്യ ഭർതൃവീട്ടിൽ നിന്നും സ്വർണവുമായി കടന്നുകളയുകയായിരുന്നു. സ്വർണത്തിനൊപ്പം പണവും സന്ധ്യ വീട്ടിൽ നിന്നും മോഷ്ടിച്ചിരുന്നു. യുവതിയെ കാണാതാകുകയും വീട്ടിൽ നിന്നും സ്വർണവും പണവും നഷ്ടപ്പെട്ടതായും മനസിലാക്കിയ ധനബാലൻ വിവാഹത്തട്ടിപ്പ് ചൂണ്ടിക്കാട്ടി പോലീസിൽ പരാതി നൽകുകയയിരുന്നു. ധനബാലനുമായുള്ള വിവാഹത്തിന് ബ്രോക്കറായി പ്രവർത്തിച്ച ബാലമുരുകൻ എന്നയാൾ ഒന്നരലക്ഷം രൂപ ഫീസായി വാങ്ങുകയും ചെയ്തിരുന്നു. ഈ വിവാഹവുമായി ബന്ധപ്പെട്ട അന്വേഷണമാണ് സന്ധ്യയെയും സംഘത്തെയും കുടുക്കിയത്.
സന്ധ്യയ്ക്ക് മറ്റൊരു വിവാഹാലോചന വന്നത് നിർണായകമായി
ധനബാലൻ്റെ വീട്ടിൽ നിന്നും സ്വർണവും പണവുമായി പോയ സന്ധ്യ മധുരയിലെ ഒരു വിവാഹ ബ്രോക്കറായ ധനലക്ഷമി വഴി മറ്റൊരു വിവാഹത്തിന് നീക്കം ആരംഭിച്ചു. ധനബാലൻ്റെ വീട്ടിൽ നിന്നും പോയി ദിവസങ്ങൾക്കകമാണ് സന്ധ്യ അടുത്ത വിവാഹത്തിന് നീക്കം ആരംഭിച്ചത്. ധനബാലിൻ്റെ പരിചയത്തിലുള്ള വ്യക്തിയുമായിട്ടാണ് ധനലക്ഷമി വഴി ആലോചന വന്നത്. ധനലക്ഷമിയുടെ പക്കൽ നിന്നും സന്ധ്യയുടെ ഫോട്ടോ ധനബാലൻ കണ്ടതോടെ പോലീസിൻ്റെ സഹായത്തോടെ സംഘത്തെ പിടികൂടാൻ നീക്കം ആരംഭിച്ചു. വിവാഹത്തിന് താൽപ്പര്യമുണ്ടെന്ന് വ്യക്തമാക്കി തട്ടിപ്പ് സംഘത്തെ ധനബാലനും കൂട്ടരും വിളിച്ചുവരുത്തുകയും വിവാഹം ഉറപ്പിക്കുകയും ചെയ്തു.
സന്ധ്യ പിടിയിലായത് ഏഴാമത്തെ വിവാഹത്തിന് എത്തിയപ്പോൾ
വിവാഹ ബ്രോക്കറായ ധനലക്ഷമി വഴി എത്തിയ വിവാഹത്തിനായി സന്ധ്യയും സംഘവും നാമക്കലിലെ തിരുച്ചങ്ങോട്ടേക്ക് വിവാഹത്തിനായി എത്തി. കാറിൽ സന്ധയും സംഘവും എത്തിയതിന് പിന്നാലെ ധനബാലനും സുഹൃത്തുക്കളും ഇവരെ പിടികൂടി പോലീസിലേൽപ്പിച്ചു. സന്ധ്യ ഇതുവരെ ആറ് വിവാഹങ്ങൾ കഴിച്ചതായി പോലീസ് പറഞ്ഞു. ബന്ധുക്കളെന്ന വ്യാജേനെ ആളുകളെ ഒപ്പം കൂട്ടി വിവാഹം കഴിക്കുകയും ഭർതൃവീട്ടിൽ നിന്നും രക്ഷപ്പെടുകയും ചെയ്യുന്നതാണ് യുവതിയുടെ രീതിയെന്ന് പോലീസ് പറഞ്ഞു. വിവാഹത്തട്ടിപ്പുമായി ബന്ധപ്പെട്ട് വിശദമായ അന്വേഷണം നടത്താനാണ് പോലീസിൻ്റെ തീരുമാനം.