ലോകത്തിലെ ആദ്യ വെള്ളക്കടുവ സങ്കേതം മധ്യപ്രദേശില്‍

മധ്യപ്രദേശ്: ലോകത്തിലെ ആദ്യ വെള്ളക്കടുവ സങ്കേതം മധ്യപ്രദേശിലെ രെവയില്‍ തുടങ്ങുന്നു. ഞായറാഴ്ച്ച സങ്കേതത്തിന്‍റെ ഔദ്യോഗിക ഉദ്ഘാടനം നടന്നു. കക്ഷി രാഷ്ട്രീയ ഭേദമെന്യേ എല്ലാ രാഷ്ട്രീയ നേതാക്കളും ഉദ്ഘടനത്തില്‍ പങ്കെടുത്തു.

മുകുന്ദ്പുരിലെ വന്യജീവി സങ്കേതത്തിലായിരുന്നു ഇതു വരെ വെള്ളക്കടുവകളെ അധിവസിപ്പിച്ചിരുന്നത്. രെവയില്‍ നിന്ന് 20 കിമി അകലത്തിലാണ് മുകുന്ദ്പുറിലെ സങ്കേതം. വിന്ധ്യ എന്ന വെള്ളക്കടുവയാണ് അവിടെ അഭയാര്‍ത്ഥിയായി കഴിഞ്ഞിരുന്നത്. തൊട്ടുത്തുള്ള മറ്റൊരു സങ്കേതത്തില്‍ മറ്റ് രണ്ട് വെള്ളക്കടുവകളുമുണ്ട്.

എന്നാല്‍ വിന്ധ്യയെ നാടിന്‍റെ അഭിമാനമായാണ് നാട്ടുകാര്‍ കണ്ടിരുന്നത്. വെള്ളക്കടുവകള്‍ക്ക്, പ്രത്യേകിച്ച് വിന്ധ്യയ്ക്ക് പ്രത്യേകമായി സങ്കേതം പണിയുന്നത് വിദേശ സഞ്ചാരികള്‍ക്കിടയില്‍ കൂടുതല്‍ മതിപ്പുളവാക്കുമെന്ന് പ്രദേശവാസികളും വിവിധ രാഷ്ട്രീയ പാര്‍ട്ടികളും വിശ്വസിക്കുന്നു. അതിനാല്‍ത്തന്നെ പല വര്‍ഷങ്ങളായി പല പാര്‍ട്ടിക്കാരുടേയും തെരഞ്ഞെടുപ്പ് പ്രകടന പത്രികയിലെ മുഖ്യ വാഗ്ദാനവും ഇതു തന്നെയായിരുന്നു.

മുഖ്യമന്ത്രി ശിവ്‍രാജ് സിങ് ചൗഹാനും കേന്ദ്ര മന്ത്രി പ്രകാശ് ജാവദേക്കറും ചേര്‍ന്നാണ് ഉദ്ഘാടനം നിര്‍വഹിച്ചത്. പുതിയ സങ്കേതം രെവയ്ക്ക് സെവന്‍ സ്റ്റാര്‍ സ്റ്റാറ്റസ് നല്‍കുമെന്ന് പ്രകാശ് ജാവദേക്കര്‍ പ്രത്യാശ പ്രകടിപ്പിച്ചു.