കല്ലെറിഞ്ഞ അക്രമികളായ പ്രക്ഷോഭകര്‍ക്കു പോലീസുകാര്‍ ചായ നല്‍കണമായിരുന്നോ? ദിലീപ് ഘോഷ്

കൊല്‍ക്കത്ത: വിവാദ പ്രസ്താവനകള്‍ മുഴക്കുന്നതില്‍ ഒട്ടും പിറകിലല്ലാത്ത നേതാവാണ് ദിലീപ് ഘോഷ്. പൗരത്വ നിയമ ഭേദഗതിയ്‌ക്കെതിരെ പ്രതിഷേധിച്ച അക്രമികള്‍ക്ക് പിന്നെ പോലീസുകാര്‍ ചായ നല്‍കണമായിരുന്നോയെന്നാണ് പശ്ചിമ ബംഗാള്‍ ബിജെപി അധ്യക്ഷന്‍ ദിലീപ് ഘോഷിന്റെ പുതിയ വിവാദ പ്രസ്താവന. ഡല്‍ഹി പോലീസിന് പിന്തുണയുമായി രംഗത്തെത്തിയിരിക്കുകയാണ് ദിലീപ് ഘോഷ്.

എവിടെ നിന്നാണ് പ്രതിഷേധക്കാര്‍ക്ക് ധനസഹായം കിട്ടുന്നതെന്ന് ഉടന്‍ പുറത്തുവരും. അമേരിക്കന്‍ പ്രസിഡന്റ് ഡോണള്‍ഡ് ട്രംപിന്റെ ഇന്ത്യ സന്ദര്‍ശനത്തിനിടയില്‍ ഇന്ത്യയുടെ പ്രതിച്ഛായ തകര്‍ക്കാനുള്ള ആസൂത്രിത നീക്കമാണ് പ്രതിഷേധക്കാരുടെയെന്ന് അദ്ദേഹം ആരോപിച്ചു.

'ഡല്‍ഹിയില്‍ പോലീസ് എന്താണോ ചെയ്തത് അത് വളരെ ശരിയായ നടപടിയാണ്. പ്രതിഷേധക്കാരോട് പോലീസ് കര്‍ശനമായിരിക്കണം. നിങ്ങള്‍ എന്താണ് പ്രതീക്ഷിക്കുന്നത്. കല്ലെറിയുകയും വെടിയുതിര്‍ക്കുകയും ചെയ്യുമ്പോള്‍ പോലീസുകാര്‍ പ്രതിഷേധക്കാര്‍ക്ക് ചായ കൊടുക്കണമായിരുന്നോ?', ദിലീപ് ഘോഷ് വാര്‍ത്താസമ്മേളനത്തിനിടെ മാധ്യമപ്രവര്‍ത്തകരോട് പറഞ്ഞു.

'ഇതെല്ലാം നമ്മുടെ രാജ്യത്തിന്റെ പ്രതിച്ഛായയെ നശിപ്പിക്കാന്‍ വേണ്ടി മുന്‍കൂട്ടി ആസൂത്രണം ചെയ്തതാണ്. ഈ സിഎഎ വിരുദ്ധ പ്രക്ഷോഭകര്‍ക്കുള്ള വിദേശ ധനസഹായം ഉടന്‍ പുറത്തുകൊണ്ടുവരും', അദ്ദേഹം പറഞ്ഞു.

ഡല്‍ഹിയിലെ ഷഹീന്‍ ബാഗില്‍ പ്രതിഷേധിക്കുന്നവര്‍ വിദ്യാഭ്യാസമില്ലാത്ത സ്ത്രീകളും പുരുഷന്മാരുമാണെന്നും കൊല്‍ക്കത്തയിലെ പാര്‍ക് സര്‍ക്കസിനു പണം കിട്ടിയതും ബിരിയാണി വിളമ്പിയതും വിദേശപണം ഉപയോഗിച്ചാണെന്ന തരത്തിലുള്ള അദ്ദേഹത്തിന്റെ പ്രസ്താവനകള്‍ വന്‍ വിവാദങ്ങള്‍ക്ക് വഴിവെച്ചിരുന്നു.