യെദ്യൂരപ്പ നാളെ ഉച്ചയ്ക്ക് സത്യപ്രതിജ്ഞ ചെയ്യുമെന്ന് സൂചന

ബംഗലൂരു: കര്‍ണാടകത്തിലെ രാഷ്ട്രീയ നാടകങ്ങള്‍ക്ക് ഇടയില്‍ നാളെ ഉച്ചയ്ക്ക് 12.20ന് ബിജെപി നേതാവ് യെദ്യൂരപ്പ മുഖ്യമന്ത്രിയായി സത്യപ്രതിജ്ഞ ചെയ്യുമെന്ന് റിപ്പോര്‍ട്ടുകള്‍. പേഴ്‍സണല്‍ ആന്‍റ് അഡ്‍മിനിസ്ട്രേറ്റീവ് റിഫോംസ് വിഭാഗത്തിന് ഇത് സംബന്ധിച്ച അറിയിപ്പ് ലഭിച്ചതായി കര്‍ണാടക ദിനപത്രം, വിജയ കര്‍ണാടക റിപ്പോര്‍ട്ട് ചെയ്‍തു. ഒരു ബിജെപി കേന്ദ്രമാണ് ഇത് സ്ഥിരീകരിച്ചത്.

കര്‍ണാടക മുഖ്യമന്ത്രിയായി സത്യ പ്രതിജ്ഞ ചെയ്യാന്‍ അനുവദിക്കണമെന്ന് ബി.എസ് യെദ്യൂരപ്പ രാവിലെ ഗവര്‍ണറോട് ആവശ്യപ്പെട്ടിരുന്നു.

"പാര്‍ട്ടി എന്നെ തെരഞ്ഞെടുത്തു. ഞാന്‍ ഗവര്‍ണര്‍ക്ക് കത്ത് നല്‍കിയിട്ടുണ്ട് അദ്ദേഹം എന്നെ വിളിക്കും എന്നാണ് ഞാന്‍ പ്രതീക്ഷിക്കുന്നത്. ശരിയായ തീരുമാനം എടുക്കുമെന്ന് അദ്ദേഹം എന്നോട് പറഞ്ഞിട്ടുണ്ട്. ഗവര്‍ണര്‍ കത്ത് നല്‍കുമ്പോള്‍ ഞാന്‍ അറിയിക്കാം" യെദ്യൂരപ്പ മാധ്യമങ്ങളോട് രാവിലെ പറഞ്ഞു.