വാത്മീകി ദളിതനെന്ന് യോഗി ആദിത്യനാഥ്; വിവാദം

ലഖ്നൌ: രാമായണം എഴുതിയ വാത്മീകി ദളിതനാണെന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. അയോധ്യയിലെ സാന്ത് സമാജിലെ പ്രസംഗത്തിനിടെ, ശ്രീരാമനെ രാമായണത്തിലൂടെ പരിചയപ്പെടുത്തിയത് വാത്മീകിയാണെന്നും അദ്ദേഹത്തിന്റെ സമുദായം തൊട്ടുകൂടാത്തവരുടേതായിരുന്നുവെന്നും യോഗി പറഞ്ഞു.

അതേസമയം, സ്ഥലത്തുണ്ടായിരുന്ന സന്യാസിമാർ യോഗി ആദിത്യനാഥിന്റെ പരാമർശത്തെ തള്ളി. രാമക്ഷേത്രത്തിലെ പ്രധാന പൂജാരി ഉൾപ്പെടെയുള്ളവർ യോഗിയുടെ പരാമർശത്തോട് എതിർപ്പ് പ്രകടിപ്പിച്ചു. സാന്ത് സമാജ് സംഘടനയ്ക്കും ശ്രീരാമനും അപമാനകരമായ പ്രസ്താവനയാണ് യോഗി നടത്തിയതെന്ന് അദ്ദേഹം പറഞ്ഞു. വാത്മീകി രാമായണം എഴുതിയ ആളാണെന്നും അദ്ദേഹത്തിന് വാത്മീകി സമുദായവുമായി ബന്ധമില്ലെന്നും രാമക്ഷേത്രത്തിലെ പൂജാരി വ്യക്തമാക്കി.

ഹനുമാൻ ദളിത് വിഭാഗത്തിൽപ്പെട്ടയാളാണെന്ന വിവാദ പരാമർശവുമായി നേരത്തെ യോഗി ആദിത്യനാഥ് രംഗത്തെത്തിയിരുന്നു. ആൾവാറിൽ ബിജെപിയുടെ തെരഞ്ഞെടുപ്പ് പ്രചാരണത്തിനിടെയായിരുന്നു വിവാദത്തിന് വഴിമരുന്നിട്ട പരാമർശം. ഹനുമാൻ വനത്തിനുള്ളിലായിരുന്നെന്നും കാട്ടാളനാണെന്നുമാണ് യോഗി പറഞ്ഞത്.