മാധ്യമപ്രവർത്തകർക്ക് നിയന്ത്രണം ഏർപ്പെടുത്തി യോഗി ആദിത്യനാഥ്

ലഖ്‌നൗ: മാധ്യമപ്രവർത്തനത്തിന് കടിഞ്ഞാണിടാൻ പുതിയ നിയമവുമായി യോഗി ആദിത്യനാഥ്. ഉത്തർപ്രദേശിലെ മാധ്യമപ്രവർത്തകർ അംഗങ്ങളായ വാട്‍സ്‍ആപ് ഗ്രൂപ്പുകളെല്ലാം സർക്കാർ സംവിധാനത്തിന്റെ കീഴിൽ റജിസ്റ്റർ ചെയ്യണമെന്ന് ഉത്തരവ്. ഈ നിർദേശം പാലിക്കാത്തവർക്കെതിരെ ഐടി ആക്‌ട് പ്രകാരം നിയമനടപടി സ്വീകരിക്കും.

നിലവിൽ ഉള്ള ഗ്രൂപ്പുകളുടെയും ഭാവിയിൽ തുടങ്ങാൻ ആഗ്രഹിക്കുന്ന ഗ്രൂപ്പുകളുടെയും അഡ്മിൻമാർ ഗ്രൂപ്പിലെ അംഗങ്ങളെ കുറിച്ചുള്ള വിവരങ്ങൾ കൈമാറണം. വാട്‍സ്‍ആപ് ഗ്രൂപ്പുകളിൽ അംഗങ്ങളായ മാധ്യമപ്രവർത്തകർ അതത് ജില്ലാ ഇൻഫർമേഷൻ ഓഫീസറുമായി ബന്ധപ്പെട്ട് വിശദവിവരങ്ങൾ കൈമാറണമെന്നും നിർദേശമുണ്ട്. ഗ്രൂപ്പ് അഡ്മിന്മാരുടെ ആധാർ കോപ്പിയും ഫോട്ടോയും ആവശ്യരേഖകളും സമർപ്പിക്കണമെന്നും നിർദേശം നൽകിയിട്ടുണ്ട്.

ഉത്തർപ്രദേശിൽ മുഴുവൻ പുതിയ ഉത്തരവിനെതിരെ ശക്തമായ പ്രതിഷേധം നടക്കുകയാണ്.ലളിത്‍പൂര്‍ ജില്ലയിലാണ് ഇപ്പോൾ ഉത്തരവ് ഇറക്കിയിരിക്കുന്നത്. എന്നാൽ സംസ്ഥാനത്തിന് പൊതുവായി അങ്ങനെയൊരു നിർദേശം നൽകിയതായി അറിയില്ലെന്ന് ഇൻഫോർമേഷൻ സെക്രട്ടറി അവനീഷ് അവസ്തി പറഞ്ഞു.