യുപിയിലെ ക്രമസമാധാനപാലനം കോമഡിയെന്ന് മന്ത്രിസഭാംഗം

ലക്നൗ: ഉത്തര്‍ പ്രദേശ് സര്‍ക്കാരിന്‍റെ ക്രമസമാധാനപാലനത്തെ കുറ്റപ്പെടുത്തി മന്ത്രിസഭാഗം. ആപ്പിള്‍ എക്സിക്യൂട്ടിവീനെ പോലീസ് വെടിവെച്ചുകൊന്ന സംഭവത്തിലാണ് യോഗി ആദിത്യനാഥ് സര്‍ക്കാരിനെതിരെ ഉത്തര്‍പ്രദേശ് മന്ത്രിസഭയിലെ തന്നെ അംഗം രംഗത്തെത്തിയിരിക്കുന്നത്.

ആപ്പിള്‍ എക്സിക്യൂട്ടീവ് വിവേക് തിവാരിയുടെ കൊലപാതകം സിബിഐ അന്വേഷിക്കണമെന്നും യുപിയിലെ ക്രമസമാധാന പാലനം പോലീസ് കോമഡിയായി താഴ്ത്തിക്കെട്ടിയിരിക്കുകയാണെന്നും ബിജെപി ഘടകകക്ഷിയായ സുഹെൽദേവ് ഭാരതീയ സമാജ് പാര്‍ട്ടി നേതാവും പിന്നോക്ക വികസനകാര്യമന്ത്രിയുമായ ഓം പ്രകാശ് രാജ്ഭര്‍ പറഞ്ഞു. ഏറ്റുമുട്ടലിന്‍റെ പേരിൽ പോലീസ് നടത്തിയ കൊലപാതകമാണ് ഇതെന്ന് സാധാരണ ജനങ്ങള്‍ക്ക് മനസ്സിലാകുമെന്നും പണത്തിനു വേണ്ടി ജനങ്ങളെ കൊല്ലുകയാണെന്നും അദ്ദേഹം തുറന്നടിച്ചു. യോഗിജിയ്ക്ക് സംസ്ഥാനത്തെ കുറ്റകൃത്യങ്ങള്‍ കുറയ്ക്കാനായിട്ടില്ലെന്നും സുരക്ഷിതരാണെന്ന് ജനങ്ങളെ ബോധ്യപ്പെടുത്താനായിട്ടില്ലെന്നും രാജ്ഭര്‍ പറഞ്ഞു.

വിവേക് തിവാരിയുടെ മരണത്തിൽ പ്രതിഷേധം കനക്കുന്നതിനിടെയാണ് മന്ത്രിസഭാംഗം തന്നെ സര്‍ക്കാരിനെതിരെ രൂക്ഷവിമര്‍ശനവുമായി രംഗത്തെത്തിയിരിക്കുന്നത്.