നേതാക്കൾ ഡൽഹിയിലേയ്ക്ക്; പുതിയ പിസിസി അധ്യക്ഷൻ ഉടൻ

ന്യൂഡൽഹി: മുതിര്‍ന്ന കോൺഗ്രസ് നേതാക്കളായ രമേശ് ചെന്നിത്തല, ഉമ്മൻ ചാണ്ടി, എംഎം ഹസൻ എന്നിവരെ കോൺഗ്രസ് അധ്യക്ഷൻ രാഹുൽ ഗാന്ധി ഡൽഹിയിലേയ്ക്ക് വിളിപ്പിച്ചു. പുതിയ കെപിസിസി അധ്യക്ഷൻ, യുഡിഎഫ് കൺവീനര്‍, രാജ്യസഭാ സീറ്റ് എന്നിവ ചര്‍ച്ച ചെയ്യാനാണ് നേതാക്കളെ വിളിപ്പിച്ചതെന്നാണ് സൂചന. പുതിയ കെപിസിസി പ്രസിഡന്‍റിനെ ജൂൺ 15നകം പ്രഖ്യാപിച്ചേക്കും.

നേതാക്കളുമായി കൂടിക്കാഴ്ച നടത്തുന്നതിനായി രാഹുൽ ഗാന്ധി ഛത്തീസ്‍‍ഗഡ് യാത്ര റദ്ദുചെയ്തിട്ടുണ്ട്. ജൂൺ 6, 7 തീയതികളിൽ ഡൽഹിയിലെത്താനാണ് സംസ്ഥാനത്തെ നേതാക്കളോട് നിര്‍ദേശിച്ചിരിക്കുന്നത്. നിലവിൽ വിദേശത്തുള്ള രാഹുൽ ഗാന്ധി ജൂൺ 5നാണ് തിരിച്ചെത്തുന്നത്. കേരളത്തിൽ സംഘടനാസംവിധാനം ശക്തിപ്പെടുത്തുന്നതിന്‍റെ ഭാഗമാണ് പുതിയ നീക്കമെന്നാണ് വിലയിരുത്തൽ.

മുല്ലപ്പള്ളി രാമചന്ദ്രൻ, കെ സുധാകരൻ, കൊടിക്കുന്നിൽ സുരേഷ്, കെ വി തോമസ് എന്നിവരെയാണ് അധ്യക്ഷസ്ഥാനത്തേയ്ക്ക് ഹൈക്കമാൻഡ് പരിഗണിക്കുന്നത്.

(ചിത്രം: മാതൃഭൂമി)