എറണാകുളം ഡിസിസി ഓഫീസിൽ ശവപ്പെട്ടിയും റീത്തും

കൊച്ചി: രാജ്യസഭാ സീറ്റ് കേരള കോൺഗ്രസിന് വിട്ടുനൽകിയതിൽ പ്രതിഷേധിച്ച് എറണാകുളം ഡിസിസി ഓഫീസിനു മുന്നിൽ എഐസിസി ജനറൽ സെക്രട്ടറി ഉമ്മൻ ചാണ്ടിയുടെയും പ്രതിപക്ഷ നേതാവ് രമേശ് ചെന്നിത്തലയുടെയും ചിത്രം പതിച്ച ശവപ്പെട്ടിയും റീത്തും വച്ച് പ്രതിഷേധം.
വെള്ളിയാഴ്ച രാത്രിയാണ് ശവപ്പെട്ടിയും റീത്തും ഓഫീസിൽ സ്ഥാപിച്ചത്. ഇതോടൊപ്പം നേതാക്കള്‍ക്കെതിരെ പ്രതിഷേധിച്ച് പോസ്റ്ററുകളും ഓഫീസിനു മുന്നിൽ പതിപ്പിച്ചിട്ടുണ്ട്. കോൺഗ്രസ് പാര്‍ട്ടിയുടെ അഭിമാനത്തെക്കാള്‍ നിങ്ങള്‍ വില നല്‍കിയത് മാണിയുടെ വീട്ടിലെ കമ്മട്ടത്തിനോ എന്നാണ് ഒരു പോസ്റ്ററിൽ പറയുന്നത്.

ഉമ്മൻ ചാണ്ടിയും ചെന്നിത്തലയും കോൺഗ്രസ് പാര്‍ട്ടിയിലെ യൂദാസുമാരാണെന്നും പോസ്റ്ററുകളിൽ പറയുന്നു.

അതേസമയം, പോസ്റ്ററുകള്‍ ആരാണ് സ്ഥാപിച്ചതെന്ന് വ്യക്തമായിട്ടില്ല. കോൺഗ്രസ് നേതൃത്വത്തിന്‍റെ ഏകപക്ഷീയമായ തീരുമാനത്തിൽ പ്രതിഷേധിച്ച് അന്നു തന്നെ യൂത്ത് കോൺഗ്രസും കെഎസ്‍‍യുവും രംഗത്തെത്തിയിരുന്നു. വെള്ളിയാഴ്ച രാത്രി പാലായിൽ നേതാക്കള്‍ക്കെതിരെ കടുത്ത മുദ്രാവാക്യങ്ങളുമായി യൂത്ത് കോൺഗ്രസ് പന്തം കൊളുത്തി പ്രകടനം സംഘടിപ്പിച്ചിരുന്നു.