നിപ വൈറസ് ബാധിച്ച് മരണം 11; കോട്ടയത്തും സംശയം

കോഴിക്കോട്: നിപ വൈറസ് ബാധ സ്ഥിരീകരിച്ച പതിമൂന്നിൽ പതിനൊന്നു പേരും മരിച്ചതായി ഔദ്യോഗികസ്ഥിരീകരണം. രണ്ടു പേരുടെ നില ഗുരുതരമാണ്. 22 പേര്‍ ലോഗലക്ഷണങ്ങളുമായി ചികിത്സ തേടിയിട്ടുണ്ട്.

നിപ വൈറസ് ബാധയെത്തുടര്‍ന്ന് മൂന്നുപേര്‍ മരിച്ച മലപ്പുറം ജില്ലയിലെ മൂര്‍ക്കനാട്, മൂന്നിയൂര്‍, തേഞ്ഞിപ്പാലം, തെന്നല പഞ്ചായത്തുകളിൽ അങ്കണവാടികള്‍ക്ക് അവധി പ്രഖ്യാപിച്ചിട്ടുണ്ട്.

ഇതിനിടെ പേരാമ്പ്രയിൽ നിന്ന് കോട്ടയത്ത് വിവാഹ ചടങ്ങിൽ പങ്കെടുക്കാനെത്തിയ 45കാരനെ പനിയും ശ്വാസം മുട്ടലും കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. നിപ വൈറസ് ബാധിതര്‍ക്കുള്ള ഐസൊലേഷൻ വാര്‍ഡിലാണ് ഇദ്ദേഹത്തെ പ്രവേശിപ്പിച്ചതെങ്കിലും ഇയാള്‍ക്ക് വൈറസ് ബാധ സ്ഥിരീകരിച്ചിട്ടില്ല. മെഡിസിൻ വിഭാഗത്തിലെ ഡോക്ടര്‍മാരുടെ നേതൃത്വത്തിൽ അതീവസുരക്ഷയിൽ ചികിത്സ തുടരുകയാണ്.