മലപ്പുറത്ത് വാട്ട്സാപ്പ് ഹര്‍ത്താലിനു പിന്നില്‍ പത്താം ക്ലാസുകാരന്‍!

മലപ്പുറം: കഠ്‍വ സംഭവത്തില്‍ പ്രതിഷേധിച്ച്‌ സംസ്ഥാനത്ത് അപ്രഖ്യാപിത ഹര്‍ത്താലിന് ആഹ്വാനം ചെയ്തതിനു പിന്നില്‍ പത്താം ക്ലാസുകാരനെന്ന് പോലീസ്. വോയ്‌സ് ഓഫ് യൂത്ത് എന്ന വാട്‌സ്‌ആപ്പ് ഗ്രൂപ്പ് വഴിയാണ് ഹര്‍ത്താല്‍ സന്ദേശങ്ങള്‍ മലപ്പുറത്ത് പ്രചരിച്ചത്. ഇതിന്‍റെ അഡ്മിന്‍ മലപ്പുറം കൂട്ടായി സ്വദേശിയായ പതിനാറു വയസ്സുകാരനാണ്.

പ്രായപൂര്‍ത്തി ആകാത്തതിനാല്‍ ഇയാളെ കസ്റ്റഡിയിലെടുത്തിട്ടില്ല. മൊബൈല്‍ ഫോണ്‍ പിടിച്ചെടുത്തിട്ടുണ്ട്. മറ്റു ചില വാട്‌സ്‌ആപ്പ് ഗ്രൂപ്പ് അഡ്മിന്‍മാരും പോലീസിന്റെ നിരീക്ഷണത്തിലാണ്.

ഹര്‍ത്താലില്‍ ജില്ലയിലെ പരപ്പനങ്ങാടി, തിരൂര്‍, താനൂര്‍ എന്നിവിടങ്ങളില്‍ വന്‍ ആക്രമണ സംഭവങ്ങള്‍ റിപ്പോര്‍ട്ട് ചെയ്തിരുന്നു. മലപ്പുറം ജില്ലയില്‍ മാത്രം അഞ്ഞൂറോളം പേര്‍ ഇതിനകം അറസ്റ്റിലായിട്ടുണ്ട്.

കോഴിക്കോടും അറസ്റ്റിലായവരുടെ ഫോണ്‍ പിടിച്ചെടുത്ത് വാട്‌സ് ആപ്പ് ഗ്രൂപ്പ് അഡ്മിന്‍മാരെ വിളിച്ച്‌ വരുത്തി അന്വേഷണം തുടങ്ങിയിട്ടുണ്ട്.