തിരുവനന്തപുരം: ഗവര്ണര് ആരിഫ് മുഹമ്മദ് ഖാന് ഒപ്പിടാതെ വന്നതോടെ തിങ്കളാഴ്ച അര്ധരാത്രി 11 ഓര്ഡിനന്സുകള് അസാധുവായി. ലോകായുക്തയുടെ അധികാരം വെട്ടിക്കുറച്ചതുള്പ്പെടെയുള്ള ഓര്ഡിനന്സുകളാണ് ഗവര്ണര്- സര്ക്കാര് പോര് തുടരുന്നതിനിടെ അസാധുവായത്. ഓര്ഡിനന്സുകളില് കണ്ണടച്ച് ഒപ്പിടാനില്ലെന്നും ഓര്ഡിനന്സ് ഭരണം അനുവദിക്കില്ലെന്നും ഗവര്ണര് പ്രഖ്യാപിച്ചിരുന്നെങ്കിലും രാത്രി വൈകിയെങ്കിലും ഒപ്പിടുമെന്ന പ്രതീക്ഷയിലായിരുന്നു നിയമവകുപ്പ്. എന്നാല് ഗവര്ണര് വിട്ടുവീഴ്ചയ്ക്ക് തയ്യാറാകാതെ വന്നതോടെ 11 ഓര്ഡിനന്സുകളും അസാധുവായി.
ഓര്ഡിനന്സുകള് അസാധുവായതോടെ ലോകായുക്തയിലെ നിയമഭേദഗതിയും അസാധുവായതായി വാദമുണ്ട്. മുഖ്യമന്ത്രിക്കെതിരായ കേസ് ലോകായുക്തയുടെ പരിഗണനയിലുള്ള സാഹചര്യത്തില് ഇത് വീണ്ടും ചര്ച്ചയാകാനും സാധ്യതയുണ്ട്. അതേസമയം ഗവര്ണറെ അനുനയിപ്പിച്ച് മുന്കാല പ്രാബല്യത്തോടെ പുതിയ ഓര്ഡിനന്സുകള് ഇറക്കാമെന്ന പ്രതീക്ഷയാണ് സര്ക്കാരിന് മുന്നില് നിലവിലുള്ളത്.