11 കാസർ​ഗോഡ് സ്വദേശികളെ ദുരൂഹ സാഹചര്യത്തിൽ കാണാതായി

മൊഗ്രാൽ: കാസർഗോഡ് സ്വദേശികളെ ദുരൂഹ സാഹചര്യത്തിൽ കാണാതായി. കാസർഗോഡ് നിന്നും ആറ് കുട്ടികളടക്കമുള്ള 11 പേരെയാണ് കാണാതായിരിക്കുന്നത്. ദുബായിലേക്ക് പുറപ്പെട്ട രണ്ട് കുടുംബങ്ങൾ ഐ.എസിൽ ചേർന്നതായാണ് സംശയിക്കുന്നത്.

മൊഗ്രാൽ സ്വദേശി സവാദ്, ഭാര്യ നസീറ മകൻ ആറുവയസുള്ള മുസബ്, മൂന്ന് വയസുകാരി മകൾ മര്‍ജാന,പതിനൊന്ന് മാസം പ്രായമുള്ള മുഹമ്മില്‍, സവാദിന്‍റെ രണ്ടാം ഭാര്യ ചെമ്മനാട് സ്വദേശി റഹാനത്ത് എന്നിവരെയാണ് കണാതായത്. നസീറയുടെ അച്ഛൻ അബ്‍ദുല്‍ ഹമീദാണ് ഇവരെ കാണാനില്ലെന്ന പരാതി പോലീസിൽ സമര്‍പ്പിച്ചിരിക്കുന്നത്. ‌‌

അണങ്കൂരിലെ മറ്റൊരു കുടുംബത്തിലെ അഞ്ച് പേരെ കൂടി കാണാതായെന്നും അബ്‍ദുല്‍ ഹമീദ് നല്‍കിയ മൊഴിയിൽ വ്യക്തമാക്കുന്നു. അണങ്കൂരിലെ അന്‍വര്‍ കൊല്ലമ്പാടി, ഭാര്യ സീനത്ത് ഇവരുടെ മൂന്ന് മക്കള്‍ എന്നിവരെയാണ് കാണാതായിരിക്കുന്നതെന്നും ഇതു സംബന്ധിച്ച് പരാതികളൊന്നും ലഭിച്ചിട്ടില്ലെന്നും പോലീസ് അറിയിക്കുന്നു.

ദുബായിൽ വ്യവസായിയാണ് സവാദ്. ഇവരെ ജൂണ്‍ 15 ശേഷം ബന്ധപ്പെടാൻ സാധിക്കുന്നില്ലെന്നാണ് അബ്‍ദുല്‍ ഹമീദ് നൽകിയിരിക്കുന്ന പരാതിയിൽ ചൂണ്ടിക്കാട്ടുന്നത്.

എന്നാല്‍ മാസങ്ങള്‍ക്ക് മുമ്പ് തന്നെ ഇവരെ കാണാതായെന്നും സംഘം യമനിൽ എത്തിയെന്നുമാണ് പോലീസന്വേഷണത്തിൽ കിട്ടിയ വിവരം. എന്നാൽ കാണാതായവരിൽ ഒരാൾ യെമനിലെത്തിയതായി അറിയിക്കാൻ വീട്ടിലേക്ക് ബന്ധപ്പെട്ടുവെന്നാണ് ഒടുവിൽ ലഭിക്കുന്ന വിവരം.

കാസര്‍കോട് നിന്നും ഐ.എഎസ്‍ കേന്ദ്രത്തിലെത്തിയവരിൽ ചിലർ കൊല്ലപ്പെട്ടതായി റിപ്പോര്‍ട്ടുകളുണ്ടായിരുന്നു. ഇതിന് തൊട്ട് പിന്നാലെയാണ് പുതിയ തിരോധാനവും റിപ്പോര്‍ട്ട് ചെയ്യപ്പെടുന്നത്. സംഭംവം ആഭ്യന്തര വകുപ്പ് ദേശീയ അന്വേഷണ ഏജന്‍സിയോട് റിപ്പോര്‍ട്ട് ചെയ്‍തിട്ടുമുണ്ട്.