21കാരി ലോകത്തെ ഏറ്റവും പ്രായം കുറഞ്ഞ മേയറോ? ആര്യ രാജേന്ദ്രൻ രാജ്യാന്തര പ്രശസ്തിയിലേയ്ക്ക്

തിരുവനന്തപുരം: തെലങ്കാനയിലെ ജവഹര്‍ നഗര്‍ മുനിസിപ്പൽ കോര്‍പ്പറേഷൻ തെരഞ്ഞെുപ്പിൽ 26 കാരി മേകലാ കാവ്യ മേയറായി തെരഞ്ഞെടുക്കപ്പെട്ടത് ഏതാനും മാസങ്ങള്‍ക്കു മുൻപാണ്. അന്ന് ഇന്ത്യയിലെ ഏറ്റവും പ്രായം കുറഞ്ഞ മേയറായിരുന്നു മേകലയെങ്കിലും അതിലും പ്രായം കുറഞ്ഞ പല മേയര്‍മാരും മറ്റു രാജ്യങ്ങളിലുണ്ടായിരുന്നു. എന്നാൽ തലസ്ഥാന നഗരിയിൽ 21കാരി ആര്യാ രാജേന്ദ്രനെ കോര്‍പ്പറേഷൻ കൗൺസിലറാക്കാൻ സിപിഎം തീരുമാനിക്കുമ്പോള്‍ തിരുവനന്തപുരം കുറിക്കുന്നത് പുതിയൊരു ചരിത്രമാണ്. ലഭ്യമായ വിവരങ്ങള്‍ അനുസരിച്ച് ലോകത്തെ ഏറ്റവും പ്രായം കുറഞ്ഞ മേയറാണ് ബിരുദ വിദ്യാര്‍ഥിയായ ആര്യ രാജേന്ദ്രൻ.

2005 നവംബര്‍ 21ന് യുഎസിലെ മിഷിഗൺ സംസ്ഥാനത്ത് ഹിൽസ്ഡേൽ നഗരത്തിൽ മേയറായ മൈക്കിള്‍ സെഷൻസ് എന്ന 18കാരനാണ് ഗിന്നസ് ലോകറെക്കോഡ് പ്രകാരം ലോകത്തെ ഏറ്റവും പ്രായം കുറഞ്ഞ മേയര്‍. എന്നാൽ അന്ന് ഹൈസ്കൂള്‍ വിദ്യാര്‍ഥിയായിരുന്ന മൈക്കില്‍ നാലു വര്‍ഷത്തെ കാലാവധി പൂര്‍ത്തിയാക്കി വര്‍ഷങ്ങള്‍ക്കു മുൻപേ സ്ഥാനമൊഴിഞ്ഞു.

പരീക്ഷാ ഹാളിൽ നിന്നാണ് ആര്യ തെരഞ്ഞെടുപ്പ് പ്രചാരണത്തിന് ഇറങ്ങിയത്. നഗരം ഭരിക്കുന്നതോടൊപ്പം ഉപരിപഠനം കൂടി മുന്നോട്ടു കൊണ്ടുപോകാനാണ് ആര്യയുടെ പദ്ധതി. തുമ്പ ഓള്‍ സെയിൻ്റ്സ് കോളേജിലെ രണ്ടാം വര്‍ഷ ബിഎസ്‍‍സി ഗണിത വിദ്യാര്‍ഥിയാണ് ആര്യ. പ്രചാരണ തിരക്കുകള്‍ മൂലം ഈ വര്‍ഷത്തെ മൂന്ന് പരീക്ഷകളും ആര്യയ്ക്ക് നഷ്ടമായി.

മറ്റൊരു യുഡിഎഫ് എംപി കൂടി? പാർട്ടി ആവശ്യപ്പെട്ടാൽ നിയമസഭയിലേക്ക് മത്സരിക്കുമെന്ന് അടൂർ പ്രകാശ്
മുടവൻമുകള്‍ സ്വദേശിയായ ഇലക്ട്രീഷ്യൻ രാജേന്ദ്രൻ്റെ മകള്‍ ആര്യ രാജേന്ദ്രൻ മത്സരരംഗത്ത് തിരുവനന്തപുരം ജില്ലയിലെ ഏറ്റവും പ്രായം കുറഞ്ഞ സ്ഥാനാര്‍ഥിയായിരുന്നു. എന്നാൽ രാഷ്ട്രീയവും സംഘടനാപ്രവര്‍ത്തനവും ആര്യയ്ക്ക് പുത്തരിയല്ല. ബാലസംഘം സംസ്ഥാന പ്രസിഡൻ്റായിരുന്ന ആര്യ എസ്എഫ്ഐ സംസ്ഥാന ഭാരവാഹി കൂടിയാണ്. സംഘടനാപ്രവര്‍ത്തനരംഗത്തെ പരിചയമാണ് തനിക്ക് കരുത്തായതെന്നാണ് ആര്യ പറയുന്നത്. വാക്കിലും പ്രവൃത്തിയിലും അടിമുടി പാര്‍ട്ടിയാണ് ആര്യ. ഒടുവിൽ മേയര്‍ സ്ഥാനത്തേയ്ക്ക് ആര്യ രാജേന്ദ്രനെ നിയമിക്കാൻ സിപിഎം ജില്ലാ സെക്രട്ടറിയേറ്റ് തീരുമാനിക്കുകയായിരുന്നു.

ബ്രിട്ടനിൽ നിന്നെത്തിയ 8 പേർക്ക് വൈറസ് ബാധ; ജനിതക മാറ്റം വന്നതാണോ എന്നറിയാൻ പരിശോധിക്കുന്നു
പാര്‍ട്ടി ഏൽപ്പിച്ച ദൗത്യം സന്തോഷത്തോടെ സ്വീകരിക്കുമെന്നാണ് ആര്യ രാജേന്ദ്രൻ ഏഷ്യാനെറ്റ് ന്യൂസിന് നല്‍കിയ അഭിമുഖത്തിൽ പറഞ്ഞത്. വിദ്യാര്‍ഥികളും വിദ്യാഭ്യാസമുള്ളവരും ഭരണരംഗത്തേയ്ക്ക് വരണമെന്നുള്ളത് ജനങ്ങളുട ആഗ്രഹമാണെന്നും ആര്യ പറഞ്ഞു. യുവാക്കള്‍ക്ക് മുൻഗണന നല്‍കക എന്ന സിപിഎം നയം കൂടിയാണ് ആര്യയ്ക്ക് തുണയായത്.

വരുന്ന നിയമസഭാ തെരഞ്ഞെടുപ്പിന് മാസങ്ങള്‍ മാത്രം ബാക്കി നിൽക്കുന്ന പശ്ചാത്തലത്തിൽ സിപിഎമ്മിന് യുവ വോട്ടര്‍മാരിലേയ്ക്ക് എത്താൻ ഊര്‍ജം പകരുന്നതാണ് തീരുമാനം. തദ്ദേശ തെരഞ്ഞെടുപ്പിൽ എൽഡിഎഫ് നേടിയ വിജയത്തിനു പിന്നാലെ സോഷ്യൽ മീഡിയ അടക്കം ആഘോഷിച്ച പുതിയ വാര്‍ത്ത എൽഡിഎഫിന് പ്രചാരണായുധമാകും.