ഊളമ്പാറയിൽ നിന്ന് മൂന്ന് അന്തേവാസികൾ മതിൽ ചാടി രക്ഷപ്പെട്ടു

ഊളമ്പാറ മാനസികാരോഗ്യകേന്ദ്രത്തില്‍ നിന്ന് മൂന്ന് അന്തേവാസികള്‍ മതില്‍ചാടി രക്ഷപ്പെട്ടു. വ്യത്യസ്ത സമയങ്ങളിലായാണ് ഇവര്‍ ആശുപത്രിയില്‍നിന്നു പുറത്തുചാടിയത്.

കൊല്ലങ്കോട് സ്വദേശി ഫെനി (19), മൂന്നാര്‍ സ്വദേശി അജയന്‍ (25), പ്രദീപ് (45) എന്നിവരാണ് പുറത്തുചാടിയത്. ഇവരില്‍ പ്രദീപ് കഴിഞ്ഞദിവസം രാവിലെയും മറ്റു രണ്ടുപേര്‍ വൈകീട്ടുമാണ് രക്ഷപ്പെട്ടത്. സംഭവത്തില്‍ പേരൂര്‍ക്കട എസ്.ഐ പ്രേംകുമാറിന്റെ നേതൃത്വത്തില്‍ പൊലീസ് അന്വേഷണം ആരംഭിച്ചു.

രോഗികളെ നിരീക്ഷിക്കാന്‍ ജീവനക്കാരും സുരക്ഷ ഉദ്യോഗസ്ഥരും ഉള്ളപ്പോള്‍ തന്നെയാണ് ഇവരെ കാണാതായത്. മാനസികാരോഗ്യ കേന്ദ്രത്തില്‍നിന്ന് മനോരോഗികള്‍ മുമ്പും ചാടിപ്പോയിട്ടുണ്ട്. ഇവരില്‍ പലരെയും വീട്ടുകാര്‍തന്നെ തിരികെക്കൊണ്ടു വിടുകയാണ് പതിവ്.