എലിപ്പനി ബാധിച്ച് സംസ്ഥാനത്ത് ഇന്ന് അഞ്ച് മരണം കൂടി

തിരുവനന്തപുരം: സംസ്ഥാനത്ത് എലിപ്പനി ബാധിച്ച് ഇന്ന് അഞ്ച് പേര്‍ കൂടി മരിച്ചു. മരിച്ച ഒരാള്‍ക്ക് രോഗം സ്ഥിരീകരിച്ചിരുന്നു. മറ്റ് നാല് പേര്‍ എലിപ്പനിയുടെ ലക്ഷണങ്ങളോടെയാണ് ചികിത്സ തേടിയെത്തിയത്. ഇതോടെ 115 പേര്‍ക്ക് ഇന്ന് രോഗം സ്ഥിരീകരിച്ചു.141 പേരാണ് രോഗ ലക്ഷണങ്ങളോടെ വിവിധ ആശുപത്രികളിലായി ചികിത്സയിലുളളത്.

കോഴിക്കോട് ജില്ലയിൽ മാത്രം ഇന്ന് 14 പേർക്ക് എലിപ്പനി സ്ഥിരീകരിച്ചു. രോഗ ലക്ഷണങ്ങളോടെ 16 പേരെയാണ് ആശുപത്രിയിൽ പ്രവേശിപ്പിച്ചിരിക്കുന്നത്. ഇതോടെ കോഴിക്കോട് ജില്ലയിൽ 118 പേർക്ക് എലിപ്പനി സ്ഥിരീകരിച്ചു. 239 പേരാണ് രോഗലക്ഷണങ്ങളോടെ ഇതുവരെ ചികിത്സ തേടിയത്.

പകര്‍ച്ചവ്യാധികള്‍ പടരുന്ന സാഹചര്യം കണക്കിലെടുത്ത് സംസ്ഥാനത്ത് 13 ജില്ലകളിലാണ് അതീവ ജാഗ്രതാ നിര്‍ദേശം പുറപ്പെടുവിച്ചിട്ടുള്ളത്. എലിപ്പനി കൂടാതെ വിവിധ ജില്ലകളിൽ മഞ്ഞപ്പിത്തം, ഡെങ്കിപ്പനി എന്നിവയും റിപ്പോര്‍ട്ട് ചെയ്യുന്നുണ്ട്. എലിപ്പനി ചികിത്സ സംബന്ധിച്ച് ആരോഗ്യവകുപ്പ് പ്രോട്ടോകോള്‍ പുറത്തിറക്കിയിട്ടുണ്ട്.